اسلام آباد (اے پی پی) وفاقی وزیر خزانہ سینیٹر اسحاق ڈار نے کہا ہے کہ وزیراعظم کی جانب سے برآمدات کے فروغ کیلئے اعلان کردہ پیکیج ملکی تاریخ کا سب سے بڑا مراعاتی پیکیج ہے، برآمد کنندگان کو اس پیکیج سے مکمل استفادہ کرتے ہوئے برآمدات کے شعبہ میں بھرپور نتائج دکھانے چاہئیں۔ وہ وفاق ایوان ہائے صنعت و تجارت پاکستان کے صدر زبیر طفیل سے بات چیت کر رہے تھے جنہوں نے جمعرات کو یہاں ان سے ملاقات کی۔ وزیر خزانہ نے کہا کہ پیکیج کے تحت مالی سال 2017-18ءکے دوران ان برآمد کنندگان کو مراعات حاصل ہوں گی جن کی برآمدات رواں مالی سال کے مقابلہ میں 10 فیصد زائد ہوں گی۔ انہوں نے کہا کہ یہ پیکیج اس بات کا ثبوت ہے کہ حکومت اعلیٰ، پائیدار اور مجموعی نمو کےلئے پرعزم ہے، یہ پیکیج برآمدات کے فروغ کےلئے محرک کا کردار ادا کرے گا جس سے اقتصادی نمو میں تیزی آئے گی۔ اس موقع پر ایف پی سی سی آئی کے صدر نے برآمد کنندگان کےلئے وزیراعظم کے مراعاتی پیکیج کی تیاری کے سلسلہ میں وزیر خزانہ کی کاوشوں کو سراہا اور کہا کہ کاروباری برادری اس پیکیج سے بہت خوش ہے کیونکہ اس سے انہیں مساوی مواقع میسر آئیں گے اور وہ خطہ کے دیگر برآمد کنندگان سے مقابلہ کرنے کے قابل ہو گئے ہیں۔
فرمان الہی
نماز کے اوقات
