سانگھڑ (نامہ نگار ) حروں کے روحانی پیشوا اور مسلم لیگ فنکشنل کے سربراہ پیر صاحب پگارا ایک ہفتے کے روحانی دورے پر جمعہ کے روز سانگھڑ پہنچ رہے ہیں اپنے روحانی دورے کے پہلے روز پیر پگارا حروں کے تاریخی مرکز گڑنگ بنگلہ پہنچیں گے جہاں رات قیام کے بعد ہفتے کی صبح گڑنگ بنگلہ میں اپنے ہزاروں مریدوں کو دیدار کرائیں گے اور ان سے روحانی خطاب کریں گے۔ہفتے کی شام پیر پگارا سانگھڑ سے بیس کلومیٹر دور اوڈ پہنچیں گے جہاں اتوار کی صبح زیارت اور روحانی خطاب ہوگا۔ 22 جنوری کی شام پیر پگارا سانگھڑ پہنچیں گے اور رات پیر صاحب جو تھلو میں قیام پذیر ہونگے۔ سانگھڑ میں پیر پگارا کی جانب سے زیارت اور خطاب 23 جنوری کی صبح ہوگا سانگھڑ میں پیر صاحب کی میزبانی کے فرائض خلیفہ علی غلام نظامانی ادا کریں گے۔ 23 جنوری کی شام پیر پگارا شہداد پور کے قریب برہون کے لیے روانہ ہوجائیں گے جہاں 24 جنوری کی صبح زیارت اور خطاب ہوگا۔ برہون سے پیرصاحب پگارا ڈوڈو جمالی کی دعوت میں شرکت کے لیے سعید آباد روانہ ہوجائیں گے۔ پیر صاحب پگارا کے ضلع سانگھڑ کے اس روحانی دورے کو بڑی اہمیت دی جارہی ہے سندہ بھر خصوصاً تھر سے ہزاروں کی تعداد میں حرجماعت سے وابستہ مریدین سانگھڑ پہنچنا شروع ہو گئے ہیں جبکہ دعوتوں کے مقامات پر دورے سے متعلق تمام تیاریاں بھی مکمل کرلی گئی ہیں۔ خلیفہ قاسم فقیر مہر کا کہنا ہے کہ حر جماعت کے لاکھوں لوگ پیر صاحب پگارا کی آمد کے شدت سے منتظر ہیں اور اپنے محبوب رہنما کا تاریخی استقبال کریں گے۔
فرمان الہی
نماز کے اوقات
