کراچی (اسٹاف رپورٹر) پہلی چیف آف دی نیول اسٹاف ہاکی چیمپئن شپ میں اتوار کو مزید دو میچوں کے فیصلے ہو گئے ہیں۔ ہاکی کلب آف پاکستان میں کھیلے گئے پہلے میچ میں نیوی نے قومی چیمپئن پی آئی اے کو با آسانی چار ایک گول سے شکست دی جبکہ دوسرے میچ میں نیشنل بینک نے پاکستان ائیر فورس کو یکطرفہ مقابلے میں چار صفر سے مات دی۔ پہلے میچ میں نیوی کی جانب سے محمد صابر، شہباز احمد، کامران اور اکبر علی نے ایک ایک گول بنایا جبکہ پی آئی اے کے لئے واحد گول شفقت رسول نے بنایا۔ دوسرے میچ میں پی اے ایف کے خلاف نیشنل بینک کے لئے ارسلان قادر نے دو گول بنا کے کامیابی میں اہم کردار ادا کیا جبکہ بلال قادر اور عتیق نے ایک ایک گول بنا کر ان کا بھرپور ساتھ دیا۔ چیمپئن شپ میں پوائنٹس ٹیبل کے حساب سے پول اے میں پی آئی اے سر فہرست ہے جبکہ نیوی دوسری، پاکستان پورٹ قاسم تیسری اور کسٹمز چوتھی پوزیشن پر ہے جبکہ پول بی میں نیشنل بینک پہلی، آرمی دوسری، پاکستان ائیرفورس تیسری اور سوئی گیس چوتھی پوزیشن پر ہے۔ پہلی چیف آف دی نیول اسٹاف ہاکی چیمپئن شپ میں پیر کو تین میچز ہوں گے آرمی کا مقابلہ سوئی گیس، پورٹ قاسم اور نیوی جبکہ تیسرے میچ میں پی آئی اے اور کسٹمز مد مقابل ہو، منگل کو آرام کا دن ہو گا ۔
فرمان الہی
نماز کے اوقات
