فرمان الہی
نماز کے اوقات
انٹرنیشنل فٹ بال اسٹار رونالڈینو کا کہنا ہے کہ پاکستان ایک پرامن ملک ہے اور بیرون ممالک کے کھلاڑیوں کو چاہئے کہ وہ پاکستان میں آکر کھیلیں۔
پاکستان کے دورے پر آئے ہوئے انٹرنیشنل فٹ بالرز نےواپسی سے قبل لاہور میں پریس کانفرنس کی جس سے گفتگو کرتے ہوئے رونالڈینو نے پاکستانی کھلاڑیوں کی تعریف کی اور کہا کہ پاکستان میں فٹ بال کابہت زبردست ٹیلنٹ ہے۔کرکٹ کے ساتھ ساتھ فٹبال بھی پاکستان میں مقبولیت حاصل کرے گا۔
پریس کانفرنس میں مانچسٹر یونائیٹڈ کے سابق کھلاڑی ریان گگز نے کہا کہ ہم یہاں دنیا کو ایک پیغام دینے آئے ہیں کہ پاکستان ایک پرامن ملک ہے۔ہم تو پاکستان کی صرف کرکٹ سے محبت کے بارے میں جانتے تھے لیکن آج ہم نے ان کا فٹ بال سے بھی پیار دیکھ لیا۔
ریان گگز نے مزید کہا کہ ہم سب کا پاکستان کے دورے پر آنے کا تجربہ بہت اچھا رہا۔نمائشی میچ کے دوران میں نے ایسے ٹیلنٹڈ کھلاڑی دیکھے جنہیں آگے بڑھنے کے لیے حوصلہ افزائی کے ساتھ اچھی کوچنگ اور بنیادی سہولیات کی ضرورت ہے۔
واضح رہے کہ انٹرنیشنل فٹ بال اسٹارز نے کراچی اور لاہور میں نمائشی میچ کھیلے جہاں رونالڈینو اور ریان گگز کی ٹیموں کے درمیان مقابلے منعقد ہوئے تھے۔
دونوں نمائشی میچز میں ٹیم رونالڈینو، ٹیم گگز پر بھاری رہی اور انہیں شکست دی۔ کراچی میں ایدھی اسٹیڈیم میں کھیلے گئے پہلے میچ میں رونالڈینو کی ٹیم نے 1-2 سے کامیابی سمیٹی جبکہ لاہور کے فورٹریس اسٹیڈیم میں کھیلے گئے میچ میں رونالڈینو 0-2سے کامیاب رہے۔
