پشاور میں ڈینگی کا مرض وبا کی شکل اختیار کرگیا جس کے باعث متاثرہ افراد کی تعداد 600 سے بڑھ گئی۔ ضلعی انتظامیہ نے ڈینگی کے خاتمے کے لیے اقدامات کا دعویٰ کیاہے مگر شہریوں کا کہنا ہے کہ انتظامیہ صرف فوٹو شوٹ کرارہی ہے۔
پشاور میں ڈینگی سے متاثرہ افراد کی تعداد میں ہر روز اضافہ ہورہا ہے۔ شہر میں ڈینگی کے سب سے زیادہ کیسز تہکال سے رپورٹ ہوئے ہیں۔
ایچ ایم سی انتظامیہ کے مطابق اسپتال میں ڈینگی کے 30 مریض داخل کرائے گئے جن میں سے 20 کو فارغ کردیا گیا ہے۔ اب تک اسپتال آنے والے 576 افراد میں ڈینگی کی تصدیق ہوچکی ہےجن میں 104 تاحال زیر علاج ہیں۔
خیبرٹیچنگ اسپتال کے انچارج ڈینگی، ڈاکٹر وزیر محمد خان کے مطابق جون سے اب تک اسپتال لائے جانے والے ڈینگی کے 5 مریض دم توڑ چکے ہیں۔
ڈی سی پشاورثاقب رضا اسلم کا کہنا ہے کہ ڈینگی پر قابو پانے کے لئے اسپرے کے ساتھ 50 سے 60 لیڈی ہیلتھ ورکرز گھر گھر آگاہی فراہم کررہی ہیں ۔
دوسری جانب شہریوں کا کہنا ہے کہ ضلعی انتظامیہ کے اہلکار علاقے میں صرف تصویریں بنوانے آتے ہیں۔