فرمان الہی
نماز کے اوقات
کراچی کے علاقے شادمان ٹاون نمبر 2 میں پولیس اہلکار کو ٹارگٹ کرکے قتل کردیا گیاجبکہ مختلف علاقوں میں فائرنگ اور تشدد کے واقعات میں 3افراد زخمی ہوگئے۔
دوسری جانب مختلف علاقوں میں پولیس نے کارروائی کرکے ٹارگٹ کلر سمیت 4ملزمان کو گرفتارکرلیا۔
ڈی ایس پی شادمان مشتاق تنولی کے مطابق شادمان نمبر 2 میں نامعلوم موٹرسائیکل سوار2ملزمان نے پولیس اہلکار نوید پر فائرنگ کردی، جس کے نتیجے میں وہ شدید زخمی ہوگیا اور ہسپتال پہنچنے سے پہلے ہی دم توڑ گیا۔
ڈی ایس پی شادمان کے مطابق جائے وقوع سے ملنے والے 9 ایم ایم پستول کے خول فارنزک کے لئے بھجوائے گئے ہیں،شہید اہلکار اسپشل برانچ میں گڈاپ کے علاقے میں تعینات تھا۔
لیاقت آبادنمبر 9 میں پولیس نے خفیہ اطلاع پر کارروائی کی اور ایم کیو ایم لندن سے تعلق رکھنے والے ملزم جاوید اختر عرف عرفان احمد کو گرفتار کرلیا۔
پولیس کے مطابق ملزم ٹارگٹ کلنگ کی وارداتوں میں ملوث ہے، ملزم جاوید پر مختلف تھانوں میں قتل اور دیگر سنگین جرائم کے 17 مقدمات درج ہیں۔
لیاقت آباد سپرمارکیٹ میں پولیس نے اسٹریٹ کرمنل عادل اور سہیل کو اسلحہ اور موٹرسائیکل سمیت گرفتار کرلیا۔
بلدیہ سعید آباد میں پولیس نے سوزکی پک اپ کی تلاشی کے دوران منشیات میں استعمال ہونے والا 15 کین ممنوعہ کیمیکل برآمد کرلیا۔
کورنگی زمان ٹاون میں ڈکیتی کے دوران مزاحمت پہ فائرنگ سے 35سالہ سہیل جاں بحق ہوگیا، نیوکراچی صبا سینما کے قریب ذاتی دشمنی پہ فائرنگ سے 24سالہ فہیم زخمی ہوگیا، ڈالمیا موچی پاڑہ میں ذاتی دشمنی کے نتیجے میں ڈنڈوں کے وار سے27سالہ غلام فرید زخمی ہوگیا۔
