کراچی (اسٹاف رپورٹر)قومی اسمبلی میں قائد حزب اختلاف سید خورشید احمدشاہ نے کہا ہے کہ کراچی کا ووٹ ایم کیوایم یا پی ایس پی نہیں کسی اور کے ہاتھ میں ہے،دونوں کا اتحاد مجبوری ہے ، پیپلزپارٹی کو ان کے ایک ہونے سے کوئی نقصان نہیں پہنچے گا، عمران کا کوئی وژن ہے نہ کوئی پالیسی ، انہیں صرف گالی دینا آتی ہے ۔ وہ جمعرات کوکراچی ایکسپو سینٹرکی پاکستان کی سب سے بڑی تجارتی نمائش ایکسپوپاکستان کے دورے کے موقع پر میڈیا سے بات چیت کررہے تھے۔خورشید شاہ نے کہا کہ ایم کیوایم اور پی ایس پی کے نئے اتحاد سے پیپلز پارٹی کو کوئی نقصان نہیں ہوگا، کیونکہ کراچی کا ووٹ ایم کیو ایم یا پی ایس پی کے نہیں کسی اور کے ہاتھ میں ہے۔انہوں نے کہاکہ ایم کیوایم پاکستان اور پاک سرزمین پارٹی والے مجبور لوگ ہیں، انہیں جہاں کہا جائے گا وہاں چلے جائیں گے۔ ہم نے پہلے ہی کہہ دیا تھا کہ دونوں جماعتوں کو ایک کردیا جائے گا۔انہوں نے کہاکہ مصطفی کمال کہتے تھے کہ ایم کیوایم کے نام نے ہمیں داغدار کیا جب کہ فاروق ستارکہتے ہیں ایم کیوایم کی 35؍ سالہ سیاسی زندگی ہے کیسے ختم کردوں۔ چیئرمین پی ٹی آئی پر تنقید کرتے ہوئے خورشید شاہ نے کہاکہ عمران خان کے پاس نہ تو کوئی پالیسی ہے اور نہ ہی وژن،عمران خان کو صرف گالی دینا آتی ہے جبکہ پیپلزپارٹی نے عوام کو حقوق دیئے۔
فرمان الہی
نماز کے اوقات
