کراچی (اسٹاف رپورٹر) پاکستان ہاکی فیڈریشن نے اس ماہ اومان میں ہونے والے تین قومی ہاکی ٹورنامنٹ کے لئے 21 رکنی قومی ہاکی ٹیم کا اعلان کردیا ہے، جمعرات کو چیف سلیکٹر اصلاح الدین نے ایدھی ہاکی اسٹیڈیم میں جونیئر ہاکی ٹیم کے ساتھ ہونے والے میچز کے بعد کھلاڑیوں کا اعلان کیا، انہوں نے کہا کہ ایک اچھی اور مضبوط ٹیم منتخب کی گئی ہے۔ سلیکٹرز ایاز خان، فرحت خان ، مصدق حسین ،صدر پی ایچ ایف بریگیڈیئر ریٹائرڈ خالد سجاد کھوکھر اورسیکریٹری اولمپئن شہباز احمد نے بھی کھلاڑیوں کی کارکردگی کا جائزہ لیا۔ رضوان سینئر قومی ٹیم کی قیادت کریں گے جبکہ ارسلان قادر کو نائب کپتان مقرر کیا گیا ہے، عرفان سینئر کو دو سال بعد قومی ٹیم کاحصہ بنایا گیا ہے۔ منتخب قومی ہاکی ٹیم 14فروری سے مسقط میں ہونے والے ٹورنامنٹ میں شرکت کرے گی، ایونٹ میں پاکستان کے ساتھ میزبان اومان اور جاپان کی ٹیمیں بھی حصہ لے رہی ہیں۔ قومی سلیکشن کمیٹی نے ملائیشیا میں ہاکی لیگ میں شرکت کے سبب قومی کیمپ میں نہ آنے والے دو کھلاڑیوں عماد شکیل بٹ اور اظفر یعقوب کو بھی ٹیم کا حصہ بنالیا، مالی مشکلات کا شکار پی ایچ ایف نے ٹورنامنٹ کے لیے25 کی بجائے21 کھلاڑیوں ہی کو ہی دورہ کے لیے منتخب کیا۔ ہیڈ کوچ و منیجر اولمپئن حسن سردار کی معاونت کوچز اولمپئن محمد ثقلین اور ریحان بٹ کریں گے۔ اولمپئن گول کیپر شاہد علی خان گول کیپنگ کوچ ہوں گے۔ٹیم عمران بٹ، مبشر علی، رضوان جونیئر،تصور عباس، فرید احمد، ابو بکرمحمود، فرید احمد، توثیق ارشد، عمر بھٹہ، رضوان سینئر (کپتان)، ارسلان قادر (نائب کپتان)، شفقت رسول، امجد علی، فیصل قادر، عماد شکیل بٹ، اظفر یعقوب، اعجاز احمد، عاطف مشتاق، علی شان، عتیق ارشد، شجیع احمد اور تنظیم الحسن پر مشتمل ہوگی۔ مظہر عباس، جنید کمال، علیم بلال، سمیع اللہ اور خضر اختر اسٹینڈ بائی ہوں گے ۔منتخب ٹیم روانگی سے قبل مختصر کیمپ میں مزید ٹریننگ حاصل کرے گی۔ کپتان رضوان سینئرنے کہا ہے کہ اپنے انتخاب اور اعتماد پر قومی فیڈریشن کاشکر گزار ہوں، ٹورنامنٹ میں کامیابی کے لیےدعویٰ نہیں کر سکتا، لیکن اچھی کارکردگی پیش کرنے کی کوشش کی جائے گی۔جاپان کی ٹیم سے مقابلے آسان نہیں ہوں گے۔
فرمان الہی
نماز کے اوقات
