فرمان الہی
نماز کے اوقات
پاکستان سپر لیگ (پی ایس ایل) تھری کے 16 ویں میچ میں ملتان سلطانز نےدفاعی چیمپئن پشاور زلمی کے لئے 184 رنز کا ہدف سیٹ کیا، جو اب تک ایونٹ کا سب سے بڑا اسکور ہے۔
ملتان سلطانز نے مقررہ 20 اوور میں صہیب مقصود85، احمد شہزاد 37، کمارا سنگاکارا 28 کی بدولت 3 وکٹ 183 رنز بنائے۔
صہیب مقصود نے ناقابل شکست رہتے ہوئے پی ایس ایل تھری میں اب تک کی سب سے بڑی انفرادی اننگز کھیلی، انہوں نے اس دوران 4 چوکے اور 7 فلک شگاف چھکے بھی لگائے۔
دبئی انٹرنیشنل کرکٹ اسٹیڈیم میں کھیلے جارہے میچ میں پشاور زلمی کے کپتان محمد حفیظ نے ٹاس جیت کر شعیب ملک کی ملتان سلطانز کو بیٹنگ کی دعوت دی۔
ملتان سلطانز کی طرف سے کمارا سنگاکارا اور احمد شہزاد نے اننگز شروع کی اور 51 رنز کا عمدہ آغاز فراہم کیا، اس دوران دونوں کھلاڑیوں نے گیند کو کئی بار بائونڈری لائن کی سیر کرائی۔
8 ویں اوور میں 51 کے اسکور پر شعیب ملک الیون کی پہلی وکٹ گر گئی،3 چوکوں اور 2 فلک شگاف چھکوں کی مدد سے 28 رنز بنانے والے کمارا سنگاکارا کو لیم ڈاسن نے شاندار بولڈ کیا۔
اوپنر احمد شہزاد کا ساتھ دینے کے لئے صہیب مقصود میدان میں اترے، دونوں کھلاڑیوں نے 40 گیندوں پر 53 رنز کی شراکت قائم کی۔
اوپنر احمد شہزاد اور صہیب مقصود نے ففٹی رنز سے زائد کی شراکت کے دوران کئی خوبصور ت اسٹروکس کھیلے، یہ پارٹنر شپ 107 کے اسکور پر ٹوٹ گئی۔
3 چوکوں کی مدد سے 37 گیندوں پر 37 رنز بنانے والے احمد شہزاد 15 ویں اوور کی پہلی گیند پر رن آئوٹ ہوگئے۔
ملتان سلطانز کے آئوٹ ہونے والے تیسرے بیٹسمین کپتان شعیب ملک تھے، 140 کے مجموعی اسکور پر 17 ویں اوور کی آخری گیند پروکٹ عمید آصف کو تھما بیٹھے،انہوں نے 13رنز بنائے۔
چوتھی وکٹ پر صہیب مقصود نے نئے آنے والے بیٹسمین کیرون پولارڈ کے ساتھ صرف 18 گیندوں پر 44 رنز کی شراکت قائم کی، اس دوران پولارڈ نے 2 بلند و بالا چھکے لگائے، وہ 16رنز پر ناقابل شکست رہے۔
دوسرے اینڈ پر موجود صہیب مقصود نے ایونٹ کی یادگار اننگز تراشی،انہوں نے ناقابل شکست رہتے ہوئے42 گیندوں پر 84 رنز بنائے۔
پشاور زلمی کی طرف سے عمید آصف اور لیم ڈاسن نے ایک وکٹ حاصل کی جبکہ دیگر بائولرز خاطر خواہ کارکردگی دکھانے میں ناکام رہے بلکہ ثمین گل، حسن علی اور وہاب ریاض نے 4،4 اوورز میں بالترتیب 42،43 اور 41 رنز دیے۔
پشاور زلمی محمد حفیظ کی قیادت میں اینڈریو فلیچر، کامران اکمل،ڈیوائن اسمتھ، رکی ویسلز، لیم ڈاسن، حماد اعظم، وہاب ریاض، عمید آصف، حسن علی اور ثمین گل پر مشتمل ہے۔
ملتان سلطانز کی طرف سے کپتان شعیب ملک،احمد شہزاد، کمارا سنگاکارا، صہیب مقصود، کیرون پولارڈ، ڈیرن برائو، سیف بدر، سہیل تنویر، عمران طاہر، جنید خان اور محمد عرفان مقابلے کے لئے میدان میں اترے ہیں۔
آج کے میچ کی فاتح پوائنٹس ٹیبل پر اپنی پہلی پوزیشن مضبوط کرلے گی، ملتان سلطانز اور پشاور زلمی کے درمیان ایونٹ کا یہ دوسرا میچ ہے۔
اس سے قبل اسی اسٹیڈیم پر ہونے والے ایونٹ کے پہلے میچ میں شعیب ملک الیون نے ڈیرن سیمی کی دفاعی چیمپئن کو 7 وکٹوں سے شکست دی تھی۔
پی ایس ایل ایک بار پھر دبئی پہنچ گیا ہے، ایونٹ کا یہ تیسرا رائونڈ ہے، اس سے قبل دبئی اور شارجہ میں میچز کھیلے جاچکے ہیں۔
اب تک کھیلے ایونٹ کے 15 میچوں ملتان سلطانز کی ٹیم بہترین رن اوسط کی بنیاد پر 7 پوائنٹس کے ساتھ سرفہرست ہے جبکہ اتنے ہی پوائنٹس رکھنے والی کراچی کنگز دوسرے نمبر پر براجمان ہے۔
پشاور زلمی جس کا رن اوسط تو اچھا ہے لیکن اسے 5 میچز میں سے صرف 3 میں کامیابی اور 2 میں شکست کا سامنا کرنا پڑا ہے، 6 پوائنٹس کے ساتھ فہرست میں تیسرے نمبر پر موجود ہے۔
