• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

تنہائی ختم، پاکستان دوبارہ عالمی فٹ بال برادری میں شامل، فیفا نے رکنیت بحال کردی

آج کا اخبار
اسپورٹس
14 مارچ ، 2018
  کراچی (شکیل یامین کانگا /اسٹاف رپورٹر) تین سال کی عالمی تنہائی کے بعد پاکستان ایک اور بار پھر عالمی فٹ بال برادری میں شامل ہوگیا۔فٹ بال کی عالمی تنظیم فیفا نے پاکستان فٹ بال کی رکنیت بحال کردی ہے اس طرح نہ صرف پاکستانی فٹ بال پر چھائے فیفا معطلی کے بادل چھٹ گئے ہیں بلکہ اب پاکستان فٹبال فیڈریشن فیفا کے آئین کی شق 13کے مطابق تمام حقوق دوبارہ حاصل کرلئے ہیں جس کے مطابق پی ایف ایف کے ماتحت تمام کلبز کو بین الاقوامی مقابلوں میں شرکت کی اجازت، اس کی ذیلی رکن تنطمیوں کے کسی بھی رکن یا حکام فیفا یا ایشین فٹبال فیڈریشن کے کسی قسم کے ترقیاتی پروگرام، کورس اور ٹریننگ پروگرام میں بھرپور شرکت کرسکیں گے۔ منگل 13مارچ کو فیفا کی سیکرٹری جنرل فاطمہ سامورا کی جانب سے جاری خط میں کہا گیا ہے کہ 6مارچ کو پاکستان فٹ بال فیڈریشن نے پاکستانی عدالت کی جانب سے ملنے والےآرڈر کی کاپی کے ساتھ فیڈریشن کے دفاتر اور اس کے بینک اکائؤنٹس کا کنٹرول تنظیم کے حوالے ہونے کی مکمل تفصیل کے ساتھ فیفا سے پاکستانی فٹ بال کی رکنیت بحال کرنے کی درخواست کی تھی لہٰذا فیفا پاکستان فٹ بال فیڈریشن کو فیفا کے آئین کی شق 13 کے مطابق حاصل تمام حقوق واپس کررہی ہے۔ واضح رہے کہ 27فروری کو لاہور ہائیکورٹ کے ڈویژن بنچ نے فیصلہ دیتے ہوئے فیصل صالح حیات اور ان کے ساتھ جون 2015میں منتخب ہونے والے پی ایف ایف عہدیداران کے انتخاب کو قانونی قرار دیتے ہوئے پاکستان فٹ بال فیڈریشن کا قبضہ فوری طور پر ان کے حوالے کرنے کا حکم صادر کیا تھا۔ یوں فیصل صالح حیات کی سربراہی میں قائم منتخب باڈی کو پی ایف ایف کا انتظامی و مالیاتی کنٹرول ملنے کے چند روز میں پی ایف ایف کی رکنیت بحال کردی گئی۔ پاکستان فٹ بال فیڈریشن کے سربراہ فیصل صالح حیات صدر نے فیفا کے فیصلے کو تاریخ ساز قرار دیتے ہوئے پاکستان بھر کی فٹ بال فیملی کو دل کی گہرائیوں سے مبارکباد دی ہے، انہوں نے کہا ہے کہ آج ہم اللہ رب العزت کے جتنے بھی شکر گزار ہوں کم ہے۔ انہوں نے اپنے تمام ساتھیوں کے عزم اور حوصلے کی داد دیتے ہوئے کہا کہ آج کا دن پاکستانی فٹ بال کو نئی روشنی بخشے گا۔ پاکستان فٹ بال فیڈریشن کے جنرل سیکرٹری احمد یار لودھی نے جنگ سے باتیں کرتے ہوئے کہا کہ فیفا کا فیصلہ بلاشبہ ایک بڑا فیصلہ ہے۔ سب کچھ اللہ کی طرف سے ہوتا ہے۔ پاکستانی فٹ بال کو تباہ کرنے والوں نے اپنی پوری کوششیں کیں لیکن فیڈریشن کے صدر فیصل صالح حیات اور ان کی پوری کابینہ حق اور سچ کیلئے لڑتی رہی۔ اور اب فیفا نے پاکستان کی رکنیت بحال کردی۔ تین سالہ بندش نے پاکستان میں فٹ بال کی بنیادوں کو ہلا کر رکھ دیا ہے اور حقیقت میں ہم کئی دہائیوں پیچھے چلے گئے ہیں، اپنے ذاتی مفادات کے لئے پاکستان کے فٹبال کو نقصان پہنچانے والوں سے میں پوچھنا چاہتا ہوں کہ انہیں پاکستان میں فٹ بال کی تباہی اور وطن عزیز کی دنیا بھر میں بدنامی کے علاوہ کیا حاصل ہوا۔ فیصل صالح حیات جلد ایک پریس کانفرنس میں پاکستان میں اور بین الاقوامی سطح پر فٹ بال سرگرمیوں کی تفصیلات کا اعلان کریں گے۔
تازہ ترین