• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

جہاد پر چل پڑے، قراردادیں راستے کی رکاوٹ نہیں بن سکتیں، چیف جسٹس

آج کا اخبار
اہم خبریں
14 اپریل ، 2018
اسلام آباد(صباح نیوز)چیف جسٹس پاکستان جسٹس میاں ثاقب نثار نے دوران سماعت ریمارکس دیئے ہیں کہ جس نے جو کہناہے کہتا رہے جو صحیح ہوگا وہ ہم کرتے رہیں گے، جہاد پر چل پڑے ہیں قراردادیں راستے کی رکاوٹ نہیں بن سکتیں، ریاست کے کام ہم کر رہے ہیں، میڈیکل کالجز کی فیسیں ہم نے کم کروائیں، ریٹائرڈ جج کو سمن کرونگا، پوچھ لیں ریفرنس کس نے نہیں دیا کس نے نہیں لیا۔ جمعہ کوچیف جسٹس پاکستان کی سربراہی میں سپریم کورٹ کے 3 رکنی بینچ نے ایڈہاک ملازم کی تقرری کیس کی سماعت کی۔ عدالت کے روبرو حکومتی وکیل نے استدعا کی کہ سپریم کورٹ از خود نوٹس لے کر ہائی کورٹ کے فیصلے کا جائزہ لے۔ چیف جسٹس نے ریمارکس دیئے کہ حکومتی اپیل زائد المیعاد ہے۔ ہم نے فیصلے قانون کے مطابق کرنا ہیں، آپ کرتے کچھ نہیں ہم سو موٹو لیتے جائیں، آپ کہتے ہیں چڑھ جا بیٹا سولی رام بھلی کرے گا، میڈیکل کالجز طلبا سے 23، 23لاکھ فیسیں لے رہے تھے ہم نے کم کروائیں، ابھی ایک کالج سے 25کروڑ روپے واپس کروائے ہیں، بلوچستان کے اسپتال میں ایم آر آئی اور سی سی یو فنکشنل نہیں، یہ کام ریاست کے کرنے کے ہیں۔چیف جسٹس نے ریمارکس دیئے کہ جس نے جو کہنا ہے کہتا رہے، جو صحیح ہوگا وہ ہم کرتے رہیں گے، جب جہاد پر چل پڑے تو کوئی قرار داد راستے میں رکاوٹ نہیں بن سکتی، ریفرنس کی بات کرتے ہیں اس سے پوچھیں جس نے ریفرنس نہیں لیا، ریٹائرڈ جج ہے پھر بھی اس کو سمن کر کے کورٹ بلالوں گا، کورٹ میں پوچھ لیں گے ریفرنس کس نے نہیں لیا یا کس نے نہیں دیا۔
تازہ ترین