راولپنڈی کے مختلف علاقوں میں لڑائی جھگڑوں کے واقعات، 5افراد زخمی

میرا شہر

اسلام آباد

23 اپریل ، 2018

راولپنڈی (سٹاف رپورٹر) راولپنڈی کے مختلف علاقوں میں لڑائی جھگڑے کے واقعات میں چار افراد زخمی ہوگئے۔ تھانہ آراے بازار کو حاجی احمد نے بتایا کہ میں نے ٹنچ بھاٹہ میں روئی دھننے والی مشین لگا رکھی ہے۔ میں معہ وقار احمد مغل اور میرا بیٹا شکیل احمد گھر کے باہر کھڑے تھے کہ اسی اثناء میں فائرنگ کی آواز آئی‘ دیکھا تو رمضان خان فائرنگ کر رہا ہے جس کو منع کیا تو اس نے جان سے مارنے کی نیت سے فائرنگ کر کے مجھے شدید زخمی کر دیا۔ تھانہ ٹیکسلا کو سمیرا بی بی نے بتایا کہ میرے دیور نصیر کی بیوی، شاہد، سخاوت، وحید، قدیر نے مسلح ہو کر میرے ساتھ دست درازی کی اور مجھے جان سے مارنے کی نیت سے مارا پیٹا جس سے میں شدید ہو گئی۔ تھانہ روات کو عبدالرحمان نے بتایا کہ سائل یونیورسٹی آیا تو سعد بخاری نے 5لڑکوں کے ہمراہ سائل پر حملہ کردیا۔ ان لوگوں سے یونیورسٹی کے ٹیچرز نے میری جان بچائی۔ چھٹی کے بعد ملزم سعد بخاری دس پندرہ لڑکوں کے ہمراہ پھر سائل کے تعاقب میں آگیا اور راستہ روک کر سائل کو ڈنڈوں اور لاتوں سے مارنا پیٹنا شروع کر دیا۔ تھانہ بنی کو فرخ خورشید سکنہ بی بلاک سیٹلائٹ ٹائون نے بتایا کہ شاہ نواز، سفیر، نصیر اور پندرہ بیس نامعلوم ملزمان میرے گھر میں زبردستی گھس آئے۔ شاہ نواز اسلحہ سے لیس تھا۔ انہوں نے مجھے مارنے کیلئے ہاتھ ڈالا اور دروازے توڑ دیئے۔ ہارون چوک میں دکاندار کو فائرنگ کر کے زخمی کر دیا گیا۔ پولیس کے مطابق تھانہ صادق آباد کے علاقہ ہارون چوک میں عرفان ولد عبدالغفور سکنہ الہ آباد اپنی سیمنٹ اور سریا کی دکان پر موجود تھا کہ اچانک 2موٹر سائیکل سوار آئے اور اس پر فائرنگ کر کے فرار ہو گئے۔ فائرنگ سے عرفان شدید زخمی ہو گیا جسے ہسپتال منتقل کر دیا گیا۔

تازہ ترین