• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

سکھر اور گردو نواح میں شدید گرمی کی لہر بد ستور برقرار، سورج دن بھر آگ برساتا رہا

آج کا اخبار
سندھ بھر سے
06 مئی ، 2018
سکھر (بیورو رپورٹ) سکھر و گرد ونواح کے علاقوں میں شدید گرمی کی لہر بدستور برقرار ہے، سورج دن بھر آگ برساتا رہا، شہریوں کی اکثریت نے دوپہر کے وقت غیر ضروری کام کاج کرنے سے گریز کیا، شاہراہوں پر ٹریفک اور بازاروں میں خریداروں میں نمایاں کمی دیکھنے میں آئی۔ سکھر، صالح پٹ، کندھرا، سنگرار، علی واہن، اروڑ، بچل شاہ میانی، باگڑجی سمیت گرد و نواح کے علاقوں کو گزشتہ کئی دنوں سے شدید گرمی نے اپنی لپیٹ میں لے رکھا ہے، بالخصوص دوپہر کے وقت سورج کی تیز شعاؤں کے باعث گرمی کی شدت میں اضافہ ہوجاتا ہے، صبح سے لیکر شام گئے تک سورج آگ برساتا رہا اور گرم ہوائیں چلتی رہیں، گرمی کی شدت کو دیکھتے ہوئے شہریوں کی اکثریت نے دوپہر کے وقت گھروں پر آرام کرنے کو ترجیح دی، غیر ضروری کام کاج کرنے سے گریز کیا جبکہ لوگ اپنے کام کاج نمٹانے کے لئے سورج کے ڈھلنے کا انتظار کرتے رہے۔ گرمی کے باعث اہم کاروباری علاقے منارہ روڈ، ایوب گیٹ، ریس کورس روڈ، ملٹری روڈ، ورکشاپ روڈ، بندر روڈ، گھنٹہ گھر چوک، شہید گنج، صرافہ بازار، بیراج روڈ ودیگر میں کاروباری سرگرمیوں میں نمایاں کمی دیکھنے میں آرہی ہے جبکہ بیرون شہر سے خریداری کے لئے آنیوالے افراد بھی گرمی کی شدت سے نڈھال نظر آتے ہیں اور مختلف علاقوں میں واقع ریڑھی بانوں اور دکانوں سے ٹھنڈے مشروبات پی کر گرمی سے بچنے کی کوششیں کرتے رہتے ہیں، ٹریفک کی روانی بھی معمول سے انتہائی کم ہے، شدید گرمی اور تپتی دھوپ میں بیرون شہر سفر کرنیوالے ادویات ساز کمپنی کے نمائندوں سمیت دیگر کاروباری حضرات کو انتہائی مشکلات کا سامنا کرنا پڑرہا ہے۔ ڈاکٹرز نے گرمی سے بچنے کے لئے شہریوں کو احتیاطی تدابیر پر سختی سے عمل کرنے کی ہدایات دیں ہیں اور مشورہ دیا ہے کہ وہ شدید گرمی بالخصوص دوپہر کے اوقات میں غیر ضروری کام کاج سے گھروں سے نکلنے سے گریز کیا، اگر نکلنا بہت زیادہ ضروری ہے تو پھر دھوپ سے بچنے کے لئے سر کو کپڑے سے ڈھانپ کر نکلیں۔
تازہ ترین