ٹیکساس، اسکول میں فائرنگ سے 8 افراد جاں بحق

18 مئی ، 2018

امریکی ریاست ٹیکساس کے شہر سانتافے کےہائی اسکول میں ایک شخص نے اندھا دھند فائرنگ کردی جس کے نتیجے میں 8افراد ہلاک اور معتدد زخمی ہوگئے ہیں۔ امریکی میڈیا کے مطابق حملہ آور ممکنہ طور پر اسکول کا طالب علم ہےجسے پولیس نے گرفتار کرلیا ہے۔

امدادی کارروائیاں جاری ہیں جبکہ فائرنگ سے ایک پولیس افسر بھی زخمی ہوا ہے جسے ریسکیو اہلکاروں نے اسپتال منتقل کردیا ہے۔

حکام کے مطابق اسکول میں فائرنگ ہوتے ہی طالب علموں نے اسکول سے باہر دوڑ لگا دی جبکہ اسکول کے اسسٹنٹ پرنسپل نے میڈیا کو بتایا کہ پولیس نے حملہ آور کو گرفتار کرلیا ہے۔

دوسری جانب ٹیکساس کے ہائی اسکول میں فائرنگ پر امریکی صدر ڈونلڈ ٹرمپ کا بیان بھی سامنے آگیا کہ ’خدا رحم کرے خبریں اچھی نہیں‘ جبکہ امریکی پولیس کا کہنا ہے کہ اسکول میں ہونے والی فائرنگ کے واقعے میں ہلاکتیں 10 ہوسکتی ہیں۔

عینی شاہدین کے مطابق آرٹ کی کلاس جاری تھی کہ اس دوران ایک شخص چلتا ہو ا اندر داخل ہوا اور اس نے اچانک فائرنگ کردی جس سے ایک لڑکی کی ٹانگ میں گولی لگی جبکہ حملہ آور کے ہاتھ میں شاٹ گن تھی۔