• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

گجرات، سی ٹی ڈی کی کارروائی6 دہشت گرد ہلاک

آج کا اخبار
ملک بھر سے
28 مئی ، 2018
گجرات(مانیٹرنگ سیل)سی ٹی ڈی نے چناب پل کے قریب کارروائی کرتے ہوئے6مبینہ دہشت گردوں کو ہلاک کر دیا جب کہ3دہشت گرد اندھیرے کا فائدہ اٹھاتے ہوئے فرار ہو گئے۔سی ٹی ڈی نے چناب پل کے قریب9دہشت گردوں کی موجودگی کی اطلاع پر کارروائی کی تو دہشت گردوں نے پولیس کو دیکھتے ہی فائرنگ کردی۔ سی ٹی ڈی کے اہلکاروں اور دہشت گردوں کے درمیان ایک گھنٹے تک فائرنگ کا سلسلہ جاری رہا جس کے نتیجے میں6مبینہ دہشت گرد ہلاک جب کہ3 اندھیر ے کا فائدہ اٹھا کر فرار ہونے میں کامیاب ہو گئے جن کی گرفتاری کے لئے سرچ آپریشن جاری ہے اور علاقے میں ناکہ بندی کردی گئی ہے۔سی ٹی ڈی ذرائع کے مطابق ہلاک دہشت گردوں میں صہیب، عبدالمقیم، فیصل، عثمان، عبدا لعظیم اور رؤف شامل ہیں جن کے قبضے سے 2 خودکش جیکٹس، کلا شنکو ف، ہینڈ گرینیڈ، اور بارودی مواد برآمد ہوا۔ سی ٹی ڈی حکام کے مطابق ہلاک ہونے والا ایک دہشتگرد صہیب جس کا نام ریڈ بک میں شامل تھا اور وہ لاہور دھماکوں میں بھی ملوث تھا۔دریں اثناء گجرات میں سی ٹی ڈی کی کارروائی میں مارے جانے والے 6 دہشت گردوں کا تعلق کالعدم تنظیم الاحرار سے نکلا، ملزمان دہشت گردی کی متعدد سنگین وارداتوں میں ملوث تھے۔ سی ٹی ڈی کی کارروائی میں دہشت گردوں کا ماسٹر مائنڈ صہیب بھی مارا گیاجو فیروز پور روڈ لاہور اور بیدیاں روڈ لاہور سمیت سرگودھا میں بریگیڈیئر کونشانہ بنانے کی وارداتوں میں ملوث تھا۔پولیس اور سی ٹی ڈی کا فرار ہونے والے تین دہشتگردوں کی تلاش کیلئے علاقے میں سرچ آپریشن جاری ہے۔معلوم ہوا ہے کہ ملزمان گجرات میں حساس عمارتوں کو نشانہ بنانا چاہتے تھے۔   
تازہ ترین