ٹوئٹر پرمشہور شخصیات کے فالوورز کم ہو گئے

14 جولائی ، 2018

سماجی رابطوں کی ویب سائٹ ٹوئٹر نے کئی جعلی ٹوئٹر اکاؤنٹس ختم کر دیے ہیں جس کے بعد دنیا کی کئی مقبول ترین شخصیات کے ٹوئٹر پر لاکھوں فالوورز کم ہو گئے ۔

ٹوئٹر کے جعلی اکاؤنٹ کے خلاف کریک ڈاؤن جاری ہے،ٹوئٹر نے غیر فعال اور لوکڈ اکاؤنٹ مکمل طور پر بند کردئے گئے ہیں۔

سب سے زیادہ فالوورز رکھنے والی امریکی گلوکارہ کیٹی پیری اور لیڈی گاگا کے 25 لاکھ فالوورز کم ہوگئے ہیں جبکہ سابق امریکی صدر براک اوباما کے 21 لاکھ فالوورز کم ہوئے ہیں۔

ٹوئٹر کا کہنا ہے کہ اس نے یہ اقدام اعتماد سازی کی اپنی عالمی مہم کے تحت کیا ہے۔

بات کی جائے بھارت کی تو بھارتی وزیر اعظم نریندر مودی کے ٹوئٹر پر تین لاکھ فلوورز کم ہوگئے جبکہ راہول گاندھی کے 17 ہزار فلوورز کم ہوگئے ۔

اس فیصلے کے دو دن کے اندر نریندر مودی کے فالوورز کی تعداد میں قریبا پونے تین لاکھ یوزرز کی کمی واقع ہوئی، 11 جولائی کو بھارتی وزیر اعظم کے ٹوئٹر پر فالوورز کی تعداد 43 اعشاریہ 3 ملین تھی جو کم ہوکر43 اعشاریہ 1ہوگئی ہے۔

11 جولائی کو ٹوئٹر نے فیک اکاؤنٹس کے خلاف کارروائی کرنے کا اعلان کرتے ہوئے کہا تھا کہ کمپنی اس سوشل پلیٹ فارم پر مثبت بات چیت اور مواد کی تشہیر اور شیئرنگ کو یقینی بنانے کے لیے پرعزم ہے۔

کمپنی کی قانونی ٹیم کے سربرارہ وجیا گڈے کا کہنا تھا کہ زیادہ تر اکاؤنٹس کے زیادہ سے زیادہ چار فالوورز ختم ہوں گے تاہم انہوں نے خبردار کیا کہ ’مشہور شخصیات کے فالوورز میں ایک قابلِ ذکر کمی آئےگی۔‘

اس اقدام کے بعد ٹوئٹر کے اپنے اکاؤنٹ کے 77 لاکھ فالوورز کم ہو گئے۔

تازہ ترین