فرمان الہی
نماز کے اوقات
لاہور (نمائندہ جنگ) پاکستان مسلم لیگ کے صدر اور سابق وزیراعظم چوہدری شجاعت حسین نے کہا ہے کہ موجودہ الیکشن ایک طرح کا ریفرنڈم تھا جس میں عوام نے کھل کر اپنی رائے کا اظہار کیا، عوام نے ملک دشمنوں کو رد کر دیا ہے، الیکشن ڈیوٹی پر تعینات فوجی جوانوں اور پولیس اہلکاروں کو لوگوں نے اپنی محبت اور یکجہتی کے اظہار کیلئے پھول پیش کئے۔کسی شخص کے نہیں، ملک کو درست سمت لے جانیوالوں کے ساتھ ہیں، شہید اہلکاروں کو سلام ہے، میڈیا سے گفتگو کرتے ہوئے انہوں نے مزید کہا کہ الیکشن کے بعد بہت برے حالات آنے کا خدشہ ہے، اس لئے تمام جماعتوں کو مل کر چلنا ہو گا۔ ایک سوال کے جواب میں انہوں نے کہا کہ اگر آل پارٹیز کانفرنس نوازشریف کی ذات کیلئے بلانی ہے تو اس کا کوئی فائدہ نہیں ہو گا، سب جماعتوں کو ملک کے مفاد کیلئے اکٹھا ہونا چاہئے۔ انہوں نے کہا کہ الیکشن رزلٹ ٹھیک آئے ہیں، منفی پروپیگنڈا کرنے والوں کو ناکامی ہو گی، عوام نے ملک کے بہتر مستقبل اور مضبوط و خوشحال پاکستان کیلئے ووٹ دیئے ہیں، پاکستان مسلم لیگ کسی شخصیت کے ساتھ نہیں بلکہ ملک کو درست سمت میں لے جانے والوں کے ساتھ چلے گی۔ چوہدری شجاعت حسین نے الیکشن ڈیوٹی کے دوران شہید ہونے والے فوجی اور پولیس اہلکاروں کو خراج عقیدت پیش کرتے ہوئے کہا کہ پوری قوم دشمن قوتوں کو شکست دینے کیلئے انشاء اللہ ہمیشہ متحد رہے گی۔ مبارکباد دینے کیلئے آنے والے بڑے اجتماع سے خطاب کرتے ہوئے انہوں نے کہا کہ ہمارے مخالفین طرح طرح کی باتیں کرتے رہے لیکن ہم گجرات سے 4 نشستوں پر کامیاب ہوئے ہیں، چوہدری پرویز الہٰی پی پی 30 سے بھی بھاری لیڈ سے جیتے ہیں۔ چوہدری پرویز الہٰی نے اپنے خطاب میں کہا کہ ہمیں اللہ کے کرم سے کامیابی حاصل ہوئی، ہم تمام ووٹرز اور کارکنوں کا دلی طور پر شکریہ ادا کرتے ہیں، چوہدری ظہور الہٰی کی شہادت کے بعد اہل گجرات نے ہمارا ہاتھ پکڑا، دعا ہے کہ ہم عوامی خدمت کا سلسلہ جاری رکھ سکیں۔ اس موقع پر شافع حسین، میاں عمران مسعودسمیت مسلم لیگی رہنما بڑی تعداد میں موجود تھے۔
