• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

عمران خان کراچی کیلئے 500ارب روپے کے پیکیج کا اعلان کریں،سراج الحق

آج کا اخبار
اہم خبریں
12 ستمبر ، 2018
کراچی (اسٹاف رپورٹر)امیر جماعت اسلامی پاکستان سینیٹر سراج الحق نے کہا ہے کہ کراچی ملک کی معاشی اور نظریاتی شہہ رگ ہے ، ملک کی ترقی وخوشحالی کے لیے کراچی کی ترقی اور خوشحالی ضروری ہے ۔ایم کیو ایم پہلے بھی حکومتوں میں شامل رہی ہے اور موجودہحکومت میں بھی شریک ہے ۔پی ٹی آئی کا مینڈیٹ ہے کہ وہ کراچی کے مسائل حل کرے، وزیراعظم عمران خان کراچی آرہے ہیں وہ اس موقع پر کراچی کے لیے 500ارب روپے کے پیکج کا اعلان کریں ، سانحہ بلدیہ فیکٹری اور سانحہ 12مئی کے ذمہ داران کو کیفر کردار تک پہنچانا حکومت کی ذمہ داری ہے ،سانحہ بلدیہ کے متاثرین کو معاوضے کی ادائیگی یقینی بنائی جائے ، کراچی میں سرکاری کوارٹروں کے مکینوں کو بے دخل کرنے کے بجائے ان کو مالکانہ حقوق دیئے جائیں ، کے الیکٹرک کے بے لگام گھوڑے کو لگام دی جائے اور کرنٹ لگنے سے جاں بحق ہونے والوں کو معاوضہ اور زخمی ہونے والوں کی کفالت کا انتطام کے الیکٹرک سے کروایا جائے ،کے الیکٹرک کو قومی تحویل میں لیا جائے ،کراچی میں پولیس اور رینجرز کی موجودگی کے باوجود اسٹریٹ کرائمز میں اضافہ حکومت کے لیے شرمناک ہے ،جامعہ کراچی کو مالی بحران سے نکالا جائے ۔ وزیر اعلیٰ سندھ اس حوالے سے اپنی ذمہ داری پوری کریں ۔عمران خان ختم نبوت اور توہین رسالت کے حوالے سے عالمی سطح پر اپنا کردار ادا کریں اور قوم کی بیٹی ڈاکٹر عافیہ صدیقی کی رہائی اور وطن واپسی کو یقینی بنانے کے لیے امریکہ سے بات کریں ، مسئلہ کشمیر پر کسی بھی حکومت کو پیچھے ہٹنے کا کوئی مینڈیٹ نہیں ہے ، موجودہ حکومت مسئلہ کشمیرپر متفقہ قومی موقف کو اٹھائے اور کشمیریوں کو ان کاحق خود ارادیت دلانے کے لے ان کی ترجمانی کرے ، ڈیم ملک کی ضرورت ہیں ، ضرور تعمیر ہونے چاہئیں ،کرپشن کی رقم وصول کرلی جائے تو ملک میں کئی ڈیم بن سکتے ہیں ۔ان خیالات کا اظہار انہوں نے ادارہ نورحق میں پریس کانفرنس سے خطاب کرتے ہوئے کیا ۔ اس موقع پر جماعت اسلامی پاکستان کے مرکزی ڈپٹی سکریٹری محمد اصغر ، امیر کراچی حافظ نعیم الرحمٰن ، ڈپٹی سکریٹری و صدر پبلک ایڈ کمیٹی کراچی سیف الدین ایڈوکیٹ ، سکریٹری اطلاعات زاہد عسکری ، جنرل سکریٹری پبلک ایڈ کمیٹی کراچی نجیب ایوبی و دیگر بھی موجود تھے ۔ اس مو قع پر انہوں نے بیگم کلثوم نواز کے انتقال پر افسوس اور دکھ کا اظہار کرتے ہوئے شریف فیملی سے اظہار تعزیت کیا ۔
تازہ ترین