یمن کا تنازع ختم کرانے کو تیار ہیں، عمران خان

20 ستمبر ، 2018

وزیر اعظم عمران خان کا کہنا ہے کہ یمن کا تنازع ختم کرانے کے لیے مثبت کردار ادا کرنے کو تیار ہیں اور مشرق وسطیٰ میں مفاہمت کار کا کردار ادا کرنا چاہتے ہیں۔

سعودی خبر ایجنسی کو انٹرویو دیتے ہوئے عمران خان نے کہا کہ ہمیشہ سعودی عرب کے ساتھ کھڑے ہے اور حوثیوں کے حملوں کے مقابلے میں سعودی عرب کا ساتھ دیں گے، کیوں کہ اُس نے ہر بُرے وقت میں پاکستان کا ساتھ دیا۔

عمران خان کا مزید کہنا تھا کہ مختلف بحرانوں کی وجہ سے 3 ماہ تک ملک سے باہر نہیں جانا تھا، تاکہ پہلے اپنا گھر ٹھیک کریں لیکن سعودی عرب کا دورہ اس لیے کیا کیوں کہ شاہ سلمان نے دعوت دی تھی، اور اس لیے بھی کہ بحیثیت مسلمان مکہ اور مدینہ جانا چاہیے۔

ان کا یہ بھی کہنا تھا کہ کرپشن کے خلاف جو سعودی عرب میں کیا گیا وہ بھی ایسا ہی کرنا چاہتے ہیں، عمران خان کے مطابق حکومت میں پسماندہ طبقے کو اوپر لایا جائے گا، انفرا اسٹرکچر نہیں عوام پر رقم خرچ ہوگی۔

ایک سوال پر انہوں نے کہا کہ ایران پڑوسی ہے، یقیناً تمام پڑوسیوں سے اچھے تعلقات ہونےچاہیں، افغانستان اور بھارت سے بھی اچھے تعلقات کی خواہش دہرائی اور کہا کہ دونون ممالک کو دوستانہ تعلقات کی پیشکش کی ہے۔

نجی زندگی سے متعلق سوال پر عمران خان نے کہا کہ گورننس ٹھیک کرلی تو فیملی کے ساتھ زیادہ وقت گزارنا آسان ہو جائے گا۔

واضح رہے کہ عمران خان نے اپنے پہلے غیر ملکی دورے میں سعودی بادشاہ سلمان اور ولی عہد شہزادہ محمد بن سلمان سے ملاقات کی، سعودی خبر ایجنسی کے مطابق ملاقات میں افغانستان، فلسطین، یمن کی صورتحال اور ایرانی مداخلت اور اس سے نمٹنے کے چیلنجز پر بات ہوئی۔

وزیراعظم عمران خان نے او آئی سی کے سیکریٹری جنرل ڈاکٹر یوسف بن احمد العثیمین، سعودی وزير توانائی خالد الفالح، صدر سعودی انوسٹمنٹ فنڈ ياسر روميان، سعودی کابینہ سیکرٹریٹ کے ایڈوائزر جنرل أحمد الخطيب سے بھی الگ الگ ملاقاتیں کیں۔

تازہ ترین