دھابیجی: مبینہ پولیس مقابلہ، 2 لیاری گینگ وار کارندے ہلاک

29 نومبر ، 2018

دھابیجی کے قریب کوسٹل ہائی وے پر مبینہ پولیس مقابلے میں لیاری گینگ وار کے دو کارندے ہلاک ہو گئے، ملزمان گزشتہ شام مومن آباد میں ہونے والے پولیس پر حملے میں بھی ملوث تھے۔

ایس ایس پی شبیر سیٹھار کے مطابق دھابیجی پولیس نے کوسٹل ھائی وے پر چیکنگ کے دوران ایک مشکوک موٹر سائیکل کو رکنے کا اشارہ کیا تو موٹر سائیکل پر سوار دونوں ملزمان نے پولیس پر فائرنگ شروع کر دی۔

پولیس کی جوابی فائرنگ سے دونوں ملزمان ہلاک ہو گئے، ہلاک ہونے والے ملزمان کا تعلق لیاری گینگ وار سے بتایا جاتا ہے اور ان کی شناخت شہزور اور عقیل کے نام سے ہوئی ہے۔

ایس ایس پی کے مطابق دونوں ملزمان گزشتہ شام کراچی کے علاقے مومن آباد میں پولیس پر ہونے والے حملے میں بھی ملوث تھے، ملزمان کے قبضے سے دو پستول برآمد ہوئے ہیں۔

تازہ ترین