منڈی بہاء الدین: ہیکرز نے اے ٹی ایم سے شہری کو لوٹ لیا

پنجاب کے شہر منڈی بہاء الدین میں ہیکرز نے اے ٹی ایم کے ذریعے شہری کے اکاؤنٹ سے ڈھائی لاکھ روپے نکال لیے،متاثرہ شہری نے کارروائی کے لیے پولیس کو درخواست دے دی ہے۔

منڈی بہاء الدین کے علاقے گوڑھا محلہ کے رہائشی امجد حسین نے پولیس کو دی گئی درخواست میں بتایا ہے کہ انہیں موبائل پر میسیج ملا کہ ان کے اکاؤنٹ سے ڈھائی لاکھ روپے نکلوائے گئے ہیں ۔

انہوں نے بتایا کہ جب انہوں نے متعلقہ بینک کے اے ٹی ایم جا کر اپنا بیلنس چیک کیا تو اکاؤنٹ سے رقم غائب تھی، اس حوالے سے انہوں نے بینک انتظامیہ کو بھی آگاہ کر دیا ہے۔

بینک انتظامیہ کا کہنا ہے کہ ریکارڈ کی چیکنگ پر ہیکنگ کا علم ہوا ہے، معاملہ فراڈ مینجمنٹ یونٹ کو بھجوا دیا گیا ہے۔