فرمان الہی
نماز کے اوقات
پیپلز پارٹی کے شریک چیرمین وسابق صدر آصف علی زرداری نے کہا ہےکہ عوام تیار ہو جائیں، حکمرانوں کو گھر بھیجنے کا وقت آ گیا ہے۔
گڑھی خدا بخش میں ذوالفقار علی بھٹو کی 40 ویں برسی کی تقریب سے خطاب کرتے ہوئے آصف زرداری نے کہا کہ ہمیں ان کی نیت پر شک ہے، یہ ہماری 18 ویں ترمیم ختم کرنا چاہتے ہیں۔
سابق صدر نے کہا کہ کل تک ان کے وزراء کہتے تھے 18 ویں ترمیم رول بیک نہیں کریں گے لیکن آج یہ 18 ویں ترمیم ختم کرنے کے درپے ہیں۔
آصف زرداری نے کہا کہ ’وہ وقت آگیا ہے کہ اب اسلام آباد کی طرف کوچ کریں اور ان کو اسلام آباد سے نکالیں، جب سے یہ آئے ہیں ڈالر 40 روپے بڑھ گیا ہے اور ہر چیز مہنگی ہو گئی ہے، آج جو مہنگائی ہے اس میں غریب زندگی نہیں گزار سکتا‘۔
انہوں نے کہا کہ چاہے میں جیل میں ہوں یا باہر اس سے کوئی فرق نہیں پڑتا، پیپلزپارٹی اب ان کو نکال باہر کرے گی، اب ان کو مزید وقت نہیں دیا جاسکتا، ان لوگوں کو حکومتی ایوانوں سے نکالنا ہے۔
آصف زرداری نے کہا کہ مجھے حکومت کا شوق نہیں ہے لیکن یہ پاکستان کو 50 سال پیچھے لے گئے ہیں، اگر یہ رہے تو ملک 100 سال پیچھے چلے جائے گا۔
سابق صدر نے کہا کہ حکمرانوں سے چھٹکارے کا اس کے علاوہ کوئی طریقہ نہیں ہے، ہم ان لوگوں کی طرح کا دھرنا نہیں دیں گے کہ شام کو واپس گھر چلے جائیں ، ہم سڑکوں پر لیٹے رہیں گے اور انہیں نکال کر واپس آئیں گے۔
انہوں نے کہا کہ میرا آپ سے وعدہ ہےکہ ہم انہیں نکالیں گے، اپنے صبر کا پیمانہ لبریز نہ کریں، بہت جلد انہیں نکالنے کی تحریک چلائیں گے۔
