’ہوسکتا ہے پی ٹی آئی میں بغاوت ہوجائے‘

24 اپریل ، 2019

پیپلز پارٹی کے چیئرمین بلاول بھٹو زرداری کے ترجمان سینیٹر مصطفیٰ نواز کھوکھر نےکہا ہے کہ ہوسکتا ہے تحریک انصاف میں بغاوت ہوجائے۔

پریس کانفرنس سے خطاب میں ترجمان بلاول بھٹو نے وزیراعظم عمران خان سے استفسار کیا کہ وہ بتائیں کہ حفیظ شیخ سے ان کی ملاقات کب ہوئی؟

انہوں نے کہا کہ ملک میں ٹیکنو کریٹ کی حکومت آگئی ہے،پی ٹی آئی حکومت میں اب ایسے لوگ آگئے ہیں، جن سے عمران خان آج تک ملے ہی نہیں۔

مصطفیٰ نواز کھوکھر نے یہ بھی کہا کہ عمران خان نے وزیراعظم بننے سے پہلے کہا تھا کہ میں پارلیمنٹ میں باقاعدگی سے آئوں گا۔

ان کا کہنا تھا کہ گزشتہ 8 ماہ سے عوام مہنگائی کی چکی میں پس رہی ہے،قوم کو کیوں نہیں بتایا جارہا کہ آئی ایم ایف سے کیا معاہدہ ہو رہا ہے۔

پی پی سینیٹر نے کہا کہ کچھ مسائل نے شدت سے اس ملک کے معاملات کو جکڑ رکھا ہے،آنے سے پہلے اعجاز شاہ نے کہا کہ عوام کی چھترول ہوگی،آج پی ٹی آئی چیئرمین ایک اجتماع میں کچھ باتیں کی ہیں۔

انہوں نے کہا کہ کیا وجہ ہے بجلی اور گیس کی قیمتیں بڑھ گئیں، عمران خان صاحب اگرآپ میں ہمت ہے تو قومی اسمبلی میں آکربات کریں۔

تازہ ترین