فرمان الہی
نماز کے اوقات
عوامی سطح پر گفتگو کاخوف بہت سےافراد میں پایا جاتا ہے کہ وہ اسٹیج پر آئیں اور حاضرین کے سامنےبات کریں۔ عام افراد کی بنسبت پیشہ ور افراد کو اس مشکل صورتحال کا سامنا زیادہ کرناپڑتا ہے۔ ماہرین ان تمام لوگوں کو ذہین افراد کی فہرست میں شامل کرتے ہیں جو نہ صرف بہترین لکھاری ہوں بلکہ بولنے کے دوران با اثر لفظو ں کااستعمال کرتے ہوئے کسی دوسرے تک اپنا موقف بخوبی پہنچاسکیں۔ جب کوئی فرد اپنا موقف کسی ایک شخص کے بجائے مجمع میں پیش کرے تو وہ ذہین ترین افراد کی فہرست میں شامل ہوجاتا ہے۔ اگر آپ اپنے کولیگز یا اعلیٰ افسران کے سامنے کسی منصوبے کو پیش کرنے یا مجمع سے خطاب کرنے کے دوران جھجھک یا خوف کا شکار ہوتے ہیں تو پھر آپ کو اپنے اندر اعتماد پیدا کرنے اور اس خوف کو ختم کرنے کی ضرورت ہے۔ خود میں تبدیلی لانے کے لیے آپ چار طریقوں پر عمل کرسکتے ہیں ۔
مقاصد کا تعین
پریزنٹیشن تیار کرنے سے قبل سب سے پہلا کام مقاصد کا تعین ہے۔ اس بات کا فیصلہ کریں کہ وہ کون سی بات ،رائے یا خیالات ہیں، جنھیں آپ پریزنٹیشن کے ذریعےلوگوں تک پہنچاناچاہتے ہیں، مثلاًکیا آپ پریزنٹیشن میں کمپنی کے کسی منصوبے کی اہمیت بیان کررہے ہیں یا پھرکسی مسئلہ پر بحث کرنے جارہے ہیں۔ اکثر اوقات بنیادی مقصد کے غیر واضح ہونے کے باعث پریزنٹیشن ناکام ہوجاتی ہے۔ دوران گفتگو اپنی توجہ اسی پیغام پر مرکوز رکھیں، یہ طریقہ آپ کودباؤ جیسی صورتحال پر قابو پانے میں بھی مدد دے گا۔
دوران پریزنٹیشن اگر آپ سامعین کے سامنےاپنے مقصد کی وضاحت کرنے میں کامیاب ہوگئے تو مطلوبہ ردعمل بھی آپ کے لیےجاننا آسان ہوجائے گا۔مقصد کی وضاحت کے لیے سامعین کی شناخت کرلیں،غیر ضروری گفتگو سے بچیں ،واضح اور براہ راست طورپر گفتگو کرنے کے لیےپیشہ ورانہ انداز اپنائیں۔ یہ سوچنے کے بجائے کہ لوگ آپ کو دیکھ کر کیا سوچ رہےہیں، آپ اس پر توجہ مرکوز کریں کہ اس پریزنٹیشن کے ذریعے آپ لوگوں کو کیا پیغام دیناچاہتے ہیں۔ یہ طریقہ کار آپ کو نروس ہونے سے بچائے گااور آپ مثبت انداز میںاپنامقصد زیادہ واضح انداز اور توانائی کے ساتھ سامعین تک پہنچاپائیں گے۔
آؤٹ لائن تیار کریں
اس بات سے کوئی فرق نہیں پڑتا کہ آپ کی پریزنٹیشن طویل ہے یا مختصر؟ پریزنٹیشن کی تحریری آؤٹ لائن کی تیاری خاص اہمیت رکھتی ہے۔اس بات کو یقینی بنائیں کہ آپ کی پریزنٹیشن منطقی طریقہ کا ر کے تحت ترتیب دی گئی ہے۔آؤٹ لائن تیارکرتے وقت اہم نکات پوائنٹس کی صورت میں لکھ لیں۔ اعدادوشمارکے ذریعے بھی مقاصد کی وضاحت کی جاسکتی ہےلیکن اعداد و شمار کے بہت زیادہ استعمال سے اجتناب کریں کیونکہ مشکل معلومات سامعین کے لیے سمجھنا مشکل ہوسکتا ہے۔ایک بار جس نکتے کو آؤٹ لائن کے لیےمنتخب کرلیں پھر اس کے متعلق سوچیں کہ آپ اسے کس طرح سامعین کے سمجھنے کے لیے آسان بناسکتے ہیں۔ آؤٹ لائن میںاہم نکات پر گفتگو کرنے کے لیے پوری تقریر لکھنے کے بجائے ’کی ورڈز‘ لکھیں جن پر نظر پڑتے ہی آپ کو یاد آجائے کہ کون کون سی ضروری معلومات دینی ہے۔ یہ طریقہ کار آپ کی پریزنٹیشن کوغیر معمولی بنا دے گا۔
ناظرین کی توجہ حاصل کریں
چاہے آپ کی آڈینس ورکرز ہوں،کولیگز ہوں یا پھر آپ کے کلائنٹس، پریزنٹیشن کے ابتدائیہ پیراگراف یا تعارف میں ہی اس بات کا تعین کرلیں کہ کس طرح آپ حاضرین کی توجہ حاصل کرسکتے ہیں۔ اگرآپ ابتدا میں ہی آڈینس کی توجہ حاصل کرنے میں کامیاب ہوگئے تو پریزنٹیشن کی کامیابی کے امکانات زیادہ ہوجاتے ہیں۔ اس حوالے سے گفتگو کا مرکزی خیال یا عنوان اتنا متاثر کن ہونا چاہیے کہ سامعین اس کی وضاحت جاننے کے لیے بے تاب ہوں۔ دوسری جانب ایک مؤثر تعارف کی تیاری کے لیے آپ انٹرنیٹ پر معروف اسپیکر ز کی تقاریر دیکھ سکتے ہیں اور غور کرسکتے ہیں کہ وہ کس طرح ابتدا سے ہی حاضرین کی توجہ حاصل کرلیتے ہیں۔
السٹریشن کا استعمال
سامعین تک بنیادی نکات کی وضاحت کے لیےالسٹریشن کا استعمال مفید ثابت ہوسکتا ہے۔اس سلسلے میں گراف بناکر، حقیقی زندگی کے تجربات کا ذکر کرتے ہوئے،ویڈیو کے ذریعے یاپھر کسی بصری اشتہار کی مدد لی جاسکتی ہے۔غور کریں کہ کون سا طریقہ کار آپ کی پریزنٹیشن کی طوالت اور عنوان سے مطابقت رکھتا ہے۔ اگر آپ پاور پوائنٹ یا ویڈیو پریزنٹیشن کا انتخاب کرتے ہیں تو پھر کسی ایسےشخص کی خدمات بھی ضرور حاصل کریں، جو اس دوران بآسانی کمپیوٹر چلاسکے۔ حرف آخر بس یہ کہ اگر آپ ایک بہترین پریزنٹربننا چاہتے ہیں تو صرف مشق کریںکیونکہ جتنی زیادہ آپ مشق کریں گے، پریزنٹیشن اتنی ہی اچھی ہوگی۔
