لاڑکانہ میں ایڈز کے مریضوں کی تعداد86 ہوگئی

01 مئی ، 2019

لاڑکانہ میں ایچ آئی وی پازیٹو کے مریضوں کی تعداد چھیاسی تک پہنچ گئی، جن میں سڑسٹھ بچے بھی شامل ہیں۔

شکارپور میں بھی دو بچے اور خیرپور میں چار افراد ایچ آئی وی پازیٹو کے مریض نکلےجبکہ لاڑکانہ ضلع میں ایچ آئی وی پازیٹو کے مریضوں کی تعداد تشویشناک حد تک بڑھتی جارہی ہے۔

منیجر سندھ ایڈز کنٹرول پروگرام ڈاکٹر سکندر میمن کے مطابق ایچ آئی وی پازیٹو کے مریضوں میں زیادہ تعداد بچوں کی ہے، سندھ ایڈز کنٹرول پروگرام کے تحت کئی لوگوں کی لوگوں کی اسکریننگ کی جاچکی ہے۔

ڈاکٹر سکندر میمن کے مطابق ایچ آئی وی کے معاملے سے متعلق بنائی گئی جے آئی ٹی نے گرفتار ڈاکٹر مظفر اور بچوں کے والدین سے معلومات حاصل کی ہیں، جلد مزید حقائق سامنے آجائیں گے۔

شکارپور کے نواحی گاؤں سارنگ شر میں بھی ایک ہی خاندان کے دو بچوں میں ایچ آئی وی پازیٹو کی تصدیق کے بعد سندھ ایڈز کنٹرول پروگرام نے وہاں مزید اسکریننگ کے لئے کیمپ لگالیا۔

خیرپور کے گاؤں پیرجو گوٹھ میں بھی ایچ آئی وی پازیٹو کے چار مریض سامنے آگئے۔ جن میں ایک لیڈی ہیلتھ ورکراوراسکا بیٹا بھی شامل ہے۔

تازہ ترین