فرمان الہی
نماز کے اوقات
آئی سی سی ورلڈ کپ میں پاکستان کرکٹ ٹیم اپنی مہم کل ویسٹ انڈیز کیخلاف میچ سے کرے گی ۔ پاکستان کرکٹ ٹیم کے کپتان سرفراز احمد ٹورنامنٹ میں فاتحانہ آغاز کیلئے پر امید ہیں ۔ محمد عامر مکمل فٹ اور پاکستان ٹیم کو سلیکشن کیلئے دستیاب ہوں گے۔
ٹرینٹ برج ناٹنگھم میں میڈیا سے گفتگو میں سرفراز احمد نے عزم ظاہر کیا کہ پاکستان ٹیم جمعہ کو ویسٹ انڈیز کیخلاف میچ میں مسلسل دس شکست کے تسلسل کو ختم کرکے ورلڈ کپ میں فاتحانہ انداز میں آغاز کرے گی ۔
سرفراز احمد نے تصدیق کی کہ محمد عامر فٹ اور پاکستان کو سلیکشن کیلئے دستیاب ہیں ۔ ان کا کہنا تھا کہ ٹیم کے تمام کھلاڑی فٹ ہیں ایسے میں فائنل الیون کی سلیکشن مشکل ہوگئی ہے۔
ذرائع کا کہنا ہے کہ پاکستان ٹیم میں محمد حسنین اور شاہین شاہ آفریدی شامل نہیں ہوں گے، عما د وسیم اور شعیب ملک میں ٹائی ہے ۔ حارث سہیل اور آصف علی میں سے بھی ایک پلیئر فائنل الیون کا حصہ بنے گا تاہم ٹرینٹ برج کی کنڈیشنز میں امکان ہے کہ آصف علی کو حارث سہیل پر ترجیح دی جائے۔
قومی ٹیم کے کپتان نے بھی ہائی اسکورنگ میچ کی امید ظاہر کی اور کہا کہ جب پریکٹس پر گراؤنڈ اسٹاف سے پوچھا کہ پار اسکور کیا ہوگا تو جواب ملا چار سو اسی ۔
سرفراز احمد کا کہنا تھا کہ وہ ورلڈ کپ میں پانچویں نمبر پر بیٹنگ کریں گے تاہم ڈیتھ اوورز میں بیٹنگ آرڈر تبدیل ہوسکتا ہے۔
ایک سوال کے جواب میں قومی ٹیم کے کپتان نے کہا کہ وہاب ریاض اور محمد عامر کے آنے سے پاکستان کا بولنگ اٹیک مضبوط ہوا ہے۔
