فرمان الہی
نماز کے اوقات
پاکستان کرکٹ ٹیم کے سابق کپتان وسیم اکرم نے سرفراز الیون کو ویسٹ انڈیز کیخلاف جارحانہ اور بلاخوف کرکٹ کھیلنے کا مشورہ دے دیا ہے۔
ناٹنگھم میں جیو نیوز سے خصوصی گفتگو میں وسیم اکرم نے کہا کہ ویسٹ انڈیز خطرناک ٹیم ہے اور اس نے حال ہی میں اس بات کا ثبوت بھی دیا ہے۔ ویسٹ انڈیز جیسی سخت ٹیموں سے نمٹنے کیلئے پاکستان کو نڈر ہوکر کھیلنا ہوگا۔ اگر جلد وکٹیں گر بھی جائیں تو بیک فٹ پر نہ آئیں۔
سابق کپتان کا کہنا تھا کہ ورلڈ کپ میں فخر زمان پر نظریں ہوں گی۔ لوگ کہتے ہیں کہ وہ کبھی چلتا ہے اور کبھی نہیں ۔ کیوں کہ اس کا اسٹائل ہی ایسا ہے۔
وسیم اکرم نے کہا کہ فخر زمان کافی عرصہ سے کھیل رہے ہیں اور اب لوگوں کو پتہ چل گیا ہے کہ فخر کو کیسے بولنگ کرانی ہے۔فخر کو اب ذہانت کا مظاہرہ کرنا ہوگا۔
سابق کپتان کا کہنا تھا کہ پاکستان نے جن 12کھلاڑیوں کا اعلان کیا وہ کافی اچھا کامبی نیشن ہے۔ فائنل الیون میں آصف علی کا ہونا ضروری ہے کیوں کہ وہ اچھا ہارڈ ہٹر ہے جس کی پاکستان کو ضرورت ہے۔
ایک سوال پر سابق کپتان نے امید ظاہر کی کہ پاکستان سیمی فائنل تک رسائی حاصل کرے لیکن ساتھ ساتھ انہوں نے یہ بھی کہا کہ پاکستان بظاہر اتنی مضبوط ٹیم نہیں اور فائنل فور تک آنے کیلئے اسے بہت محنت کرنا ہوگی۔
