یاسر نے اقراء کیساتھ دلچسپ ویڈیو شیئر کردی

پاکستانی میزبان و ادکار یاسر حسین نے لکس اسٹائل ایوارڈز میں اقراء عزیز کی کیپ کی تیاری کی ویڈیو شیئر کردی۔

اداکارہ اقراء عزیز اور یاسر حسین نے ایوارڈ تقریب کے لیے میچنگ کے ملبوسات کا انتخاب کیا، تقریب میں ان کی جوڑی سفید رنگ کے کوٹ سوٹ میں دکھائی دی۔ دونوں کے ملبوسات معروف ڈیزائنر علی ذیشان نے تیار کیے جو اکثر بالی وڈ اور دیگر نامور شخصیات کے ملبوسات کی ڈیزائننگ کرتے رہتے ہیں۔

اداکارہ کے کوٹ سوٹ میں کیپ کا اضافہ دیکھا گیا اور ساتھ ہی طویل پونی والے اسٹائل نے اُنہیں سب سے منفرد کیا۔ یاسر حسین اور اقراء عزیز دونوں نے ملبوسات کو تیار کرتے وقت کی ایک ویڈیو انسٹاگرام پر شیئر کی اور مداحوں کو آگاہ کیا کہ اُن کی کیپ پر بنے نقش و نگار اور مصوری ڈیزائنر نے خود ہاتھوں سے تیار کی ہے۔

ویڈیو میں دیکھا جاسکتا ہے کہ ڈیزائنر علی ذیشان نے اقراء عزیز کی کیپ کے لیے سیاہ اور سفید رنگ کے ساتھ ’لو برڈز‘ کی تھیم پسند کی جسے محنت اور لگن سے ہاتھوں سے تیار کیا۔ اقراء کی کیپ پر ڈیزائنر اور ان کے ساتھیوں نے ہاتھ سے مصوری کی ہے جس میں  انہوں نے دل، پرندے اور سیاہ و سفید پھول پتیاں ڈیزائن کیں۔

یاسر حسین نے علی ذیشان کی کاریگری کی داد دیتے ہوئے کہا کہ ’جادو گر کا جادو ،ہاتھوں کا کمال ہے، کرتے تم کیسے ہو سب کا یہ سوال ہے۔‘

اداکارہ نے علی ذیشان کا اور ان کی ٹیم کا شکریہ ادا کرتے ہوئے کہا کہ یہ سب محبت اور فن کا معاملہ ہے۔