عامر کی ریٹائرمنٹ پر شعیب اختر مایوس

27 جولائی ، 2019

پاکستان کے سابق آل راؤنڈر وسیم اکرم کے بعد اسپیڈ اسٹار شعیب اختر نے بھی محمد عامر کی ٹیسٹ کرکٹ سے ریٹائرمنٹ پر مایوسی کا اظہارکیا ہے۔

شعیب اختر نے اپنے یوٹیوب چینل پر ویڈیو پیغام میں کہا ہے کہ مجھے لگ رہا ہے محمد عامرکے بعد شاید حسن علی، وہاب ریاض اور جنید خان بھی ریٹائرمنٹ دے دیں۔

شعیب اختر نے حیرت کا اظہار کرتےہوئے کہا کہ 27سالہ محمد عامر ریٹائر کیسے ہوسکتا ہے؟ پاکستان نے اُن پر اتنی انوسٹمنٹ کی ہے، انہیں میچ فکسنگ سے نکال کر واپس لائے ہیں اور کھلانے کی کوشش کر رہے، وہ اچھی فارم میں واپس آئے ہیں تو ریٹائرمنٹ دے رہے ہیں، یہ پاکستان کو پے بیک کرنے کا وقت تھا اور آپ کو چاہئے تھا ملک کو ٹیسٹ سیریز جتواتے۔

سابق فاسٹ بولر نے کہا کہ یہ سب ٹی20 کے بولر بننا چاہتے ہیں، انہیں ون ڈے کھیلتے ہوئے بھی خوف آتا ہے۔

انہوں نے کہا کہ اگر میرے جیسا کوئی کرکٹ بورڈ میں آگیا تو یقین جانیں ٹی 20 کیا اِنہیں پاکستان میں کسی حصے سے بھی نہ کھیلنے دوں، آپ پیسہ بنائیں لیکن پاکستان پہلے ہے، اُسے آپ کی ضرورت ہے۔

تازہ ترین