فرمان الہی
نماز کے اوقات
سندھ کے ضلع بدین میں بارشوں کے بعد برساتی نالوں میں طغیانی آ گئی ہے، سیم نالہ گونی پھلیلی آؤٹ فال ڈرین بارش کے پانی کا دباؤ برداشت نہ کرتے ہوئے ٹوٹ گیا۔
بدین میں کراچی ہائی وے کے قریب طغیانی کے بعد سیم نالے میں 50 فٹ چوڑا شگاف پڑ گیا۔
محکمۂ ڈرین بدین کے ذرائع کے مطابق گونی پھلیلی آؤٹ فال ڈرین ضلع بدین کا دوسرا بڑا سیم نالہ ہے جس کے ذریعے ٹنڈو محمد خان اور ماتلی کی زرعی اراضی کا فاضل پانی سمندر میں چھوڑا جاتا ہے۔
حالیہ بارش کے بعد سیم نالے پر پانی کا دباؤ بڑھ گیا اور برساتی پانی کے ریلے نے سیم نالے کے مغربی پشتے میں شگاف ڈال دیا۔
شگاف سے بہنے والے پانی سے ملحقہ اراضی زیر آب آگئیں جبکہ سیم نالے کا سیلابی ریلہ گاؤں بادل چانڈیو کی جانب بڑھ رہا ہے۔
انتظامیہ کی جانب سے امدادی کارروائیاں شروع نہ ہونے کے خلاف علاقہ مکینوں نے شدید احتجاج کیا ہے اور مظاہرین نے کراچی بدین ہائی وے بند کر دی ہے۔
