زیادتی کے 200 کیسز نمٹانے والی خاتون ایس ایچ او

دو ماہ قبل پاکستان کے صوبہ پنجاب کے شہر ضلع پاکپتن میں پہلی مرتبہ خاتون پولیس افسر ایس ایچ او تعینات ہونے والی کلثوم فاطمہ نے اب تک تقریباً دو سو زیادتی کے کیسز نمٹادیئے۔

پاکستان میں خواتین کے ساتھ جنسی زیادتی کے واقعات تھم نہیں پا رہے، اس حوالے سےصوبہ پنجاب کا شہر قصور توجہ کا مرکز بنا ہوا ہے۔ یہاں کم سن بچیوں کے زیادتی کے بعد انہیں قتل کر دیا جاتا ہے۔

کلثوم فاطمہ نے برطانوی نشریاتی ادارے کو انٹرویو دیا جس میں ان کا کہنا تھا کہ ’چند سال قبل جب ان واقعات کے بارے میں سنتی رہتی تھی، میرے لئے یہ ناقابلِ برداشت تھا، مگر میں کیا کر سکتی تھی، میرےصرف غصہ کرنے یا باتوں سے کمسن بچیاں محفوظ نہیں ہو سکتی تھیں‘۔

پاکپتن میں پہلی خاتون پولیس ایس ایچ او تعینات

ضلع پاکپتن میں پہلی مرتبہ خاتون پولیس افسر کو ایس...

ان کا کہنا تھا کہ ’میرے دل میں‘ یہ چیز آئی کہ ایک بار اللہ تعالیٰ مجھے کسی ایسے عہدے پر پہنچا دے، تو کم از کم میں ان درندوں کو نہ چھوڑوں‘۔

کلثوم فاطمہ نے مزید کہا کہ ’مجھے موقع ملا، میں نے مقابلے کے امتحان کے ذریعے پنجاب پولیس میں بطور سب انسپکٹر شمولیت اختیار کی، مجھے کام بھی وہی سونپا گیا جو میں کرنا چاہتی تھی‘۔

بی بی سی کی رپورٹ کے مطابق کلثوم فاطمہ کو ’تحقیقات بھی ان مقدموں کی سونپی گئیں جو عورتوں اور بچیوں کے ساتھ زیادتی سے متعلق تھے۔‘

واضح رہے کہ خاتون سب انسپکٹر کلثوم فاطمہ کو ڈی پی او  عبادت نثار نے ماڈل تھانہ ڈلو ریام میں ایس ایچ او تعینات کیا تھا۔

ڈی پی او عبادت نثار کا کہنا تھا کہ پاکپتن پولیس میں خواتین افسران کی قابلیت اور اہلیت کسی سے کم نہیں، خاتون پولیس افسر کی تعیناتی سے لوگوں کو فوری انصاف کی فراہمی میں آسانی ہو گی۔