• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ہم مقبوضہ کشمیر کی آزادی تک چین سے نہیں بیٹھیں گے، یاورعباس، ایتھنز میں یوم پاکستان کی تقریب

آج کا اخبار
یورپ سے
24 اگست ، 2019
ہم مقبوضہ کشمیر کی آزادی تک چین سے نہیں بیٹھیں گے، یاورعباس، ایتھنز میں یوم پاکستان کی تقریب

ایتھنز (مرزا رفاقت حسین) پاکستان کمیونٹی کے زیر اہتمام یوم پاکستان کی تقریب کو یومِ یکجہتی کشمیر کے طور پر منایا گیا۔ صدارت چوہدری مہدی خاں باسریاں نے کی جبکہ فقید المثال تقریب کے مہمان خصوصی قائم مقام سفیر پاکستان یاور عباس اور لندن سے تشریف لائے کشمیری رہنما بیرسٹر عبدالمجید ترمبو تھے۔ تلاوت قرآن پاک کی سعادت عاقب جاوید نے حاصل کی بارگاہِ رسالت میں قاری محمد الیاس گولڑوی نے نذرانہ عقیدت پیش کیا میزبانی کے فرائض جنرل سیکرٹری اوورسیز الائنس فورم چوہدری مدثر خادم سوہل نے ادا کیے۔ تقریب میں پاکستانی برادری کی سیاسی، سماجی، کاروباری، دینی جماعتوں، نوجوانوں یونانی ممبر اسمبلی عرب کیمونٹیز سے تعلق رکھنے والے افراد اور پاکستانی فیملیزکی شرکت نے تقریب کو چار چاند لگا دئیے۔ بیرسٹر عبدالمجید ترمبو نے کشمیر کا تاریخی پس منظر بیان کرتے ہوئے کہا کہ بھارت غیر آئینی اقدامات کے تحت کشمیر پر قابض ہونا چاہتا ہے اب وہ وقت دور نہیں جب بھارت ٹکڑے ٹکڑے ہو جائے گا بھارتی حکومت مسلم اکثریت کو اقلیت میں تبدیل کرنے کا خواب دیکھ رہی ہے کشمیر کے لئے عالم اسلام میں جو کردار پاکستان نے ادا کیا ہے اس کی نظیر نہیں ملتی۔ ہمیں انٹرنیشنل سطح پر اس مسلہ کو اجاگر کرنا ہے۔ قبل ازیں قائم مقام سفیر پاکستان یاور عباس نے اپنے خطاب میں تقریب کے منتظمین کو زبردست الفاظ میں خراج تحسین پیش کرتے ہوئے کہا کہ وہ وقت دور نہیں بہت جلد کشمیر آزاد ہوگا یونان سمیت پوری دنیا میں مقیم پاکستانیوں نے یوم پاکستان کو یومِ یکجہتی کشمیر کے طور پر منایا جو اس بات کا واضح ثبوت ہے کہ ہم مقبوضہ کشمیر کی آزادی تک چین سے نہیں بیٹھیں گے کشمیر میں جاری ظلم وجبر پر ایک منٹ کی خاموشی اختیار کی گئی سفیر پاکستان کے خطاب سے پہلے ننھے منے بچوں نے دھن پر قومی ترانہ پیش کیا۔بچوں میں معراج نصیر،عقیل احمد،شیس اکرم،ایان ذوالفقار،ادریس علی،نعمان نصیر اورفیضان علی نے تقریری مقابلہ میں حصہ لیا ۔قائم مقام سفیر پاکستان نے بچوں کی حوصلہ افزائی کی چوہدری مہدی خاں باسریاں نے پاکستانی برادری کا شکریہ ادا کرتے ہوئے کہا کہ مجھے بچوں کا جذبہ حُب الوطنی دیکھ خوشی ہوئی ہے میں یونانی ممبر اسمبلی،عرب کیمونٹیز، پاکستانی برادری کی سیاسی سماجی کاروباری دینی جماعتوں صحافی برادری ،یوتھ فورم، انتظامیہ، تعاون کرنے والے احباب اورپاکستانی فیملیز کا تہہ دل سے مشکور ہوں جنہوں نے تقریب میں شرکت کر کے اسے بے مثال بنا دیا۔تقریب میں مہمانوں کے لئے طعام کا اہتمام بھی کیا گیا تھا۔

تازہ ترین