گورنر اور وزیر اعلیٰ کی ایک ساتھ مزار قائد پر حاضری

11 ستمبر ، 2019

بانی پاکستان قائد اعظم محمد علی جناح کے 71 ویں یوم وفات کے موقع پر مزار قائد پر تقریب منعقد کی گئی،جبکہ گورنر سندھ ، وزیر اعلیٰ سندھ اور تینوں مسلح افواج کے نمائندوں نے مزار پر حاضری بھی دی۔

گورنر سندھ عمران اسماعیل اور وزیر اعلیٰ سندھ مراد علی شاہ نے صوبائی کابینہ کے ارکان کے ہمراہ مزار قائد پر حاضری دی ، پھولوں کی چادر چڑھائی اور فاتحہ خوانی کی۔

اس موقع پر میڈیا سے بات کرتے ہوئے گورنر سندھ عمران اسماعیل نے کہا کہ کراچی سے متعلق جو کمیٹی بنائی گئی ہے وہ صرف سفارشات مرتب کرے گی اور اٹھارویں ترمیم میں بھی کوئی تبدیلی نہیں ہو رہی۔

وزیر اعلیٰ سندھ مراد علی شاہ نے بھی میڈیا سے بات کرتے ہوئے بتایا کہ کشمیر کے مسئلے پر پورا پاکستان ایک ہے، ایک سوال کے جواب میں مراد علی شاہ کا کہنا تھا کہ مجھ سے وفاق نے کراچی کے مسائل پر کوئی رابطہ نہیں کیا میڈیا سے پتہ چلا ہے کہ کوئی کمیٹی بنائی گئی ہے۔