فرمان الہی
نماز کے اوقات
والدین کی بچوں سے محبت ایک قدرتی امر ہے ،تاہم آج کل باپ کی بیٹی سے محبت کی مثالی اور متاثر کن کہانی ترک میڈیا میں نمایاں جگہ بنارہی ہے۔
بچی کے والد نے بھاری قرض لے کر چھ دنوں میں خود چار کلومیٹر طویل پہاڑی سڑک تعمیر کی تاکہ اس کی کم سن بیٹی اسکول جاسکے۔
میڈیا رپورٹ کے مطابق ترکی کے جنوب مغربی صوبے مولا کے ایک دیہی علاقے میں کم سن غامزے کورکت نرسری اسکول اس لیے نہیں جاسکی کہ مناسب سڑک نہ ہونے کی وجہ سے اسکول بس اس تک نہیں آسکتی تھی کیونکہ اس کے گھر تک جانے والی پہاڑی سڑک خراب اور انتہائی تنگ تھی۔
غامزے کے خاندان کی طرف سے بلدیہ اور قومی تعلیم کی صوبائی نظامت کونئی سڑک بنانے کی درخواستیں کی گئیں جنہیں مسترد کردیا گیا کہ یہ گندی جنگلی سڑک ہے، کچھ نہیں کرسکتے ۔
والد نے سال بھر انتظار کیا مگر کچھ نہیں بدلا۔ اب غامزے چھ سال کی تھی اور اسے منٹیسے ضلع کے پرائمری اسکول میں داخل کرایا گیا، والد رمضان نے بیٹی کو ٹریکٹر پر بٹھا کرقریب ترین مرکزی سڑک پر جانا شروع کیا جہاں اسے اسکول بس مل سکتی تھی۔
تاہم یہ طویل اور تھکا دینے والا راستہ تھا، سڑک کی بدحالی کی وجہ سے بیٹی کی تعلیم متاثر ہوتے دیکھ کرانہوں نے خود کچھ کرنے کا فیصلہ کیا۔
انہوں نے اپنے ہاتھوں سے سڑک کو صاف کیا، اسے کھودا، اور ہموار کیا۔ بھاری قرض لے کر اس نے ڈگر اور چار ٹرک کرائے پر لیے۔
میونسپلٹی نے اسے ایک ٹرک اورمحکمہ جنگلات نے اسے ایک گریڈر فراہم کیا ۔ چھ دنوں میں والد نے چار کلومیٹر سڑک بنادی۔
اب غامزے آرام سے اسکول جاسکتی ہے، اور اسکول بس اب اسے دروازے سے پک اور ڈراپ کرتی ہے۔
غامزے کا خاندان اس سڑک کی تعمیر کی وجہ سے بھاری قرض تلے دب گیا، تاہم سڑک کی تعمیر کے فوری بعد ایک غیر متوقع شخصیت نے ان کا دروازہ کھٹکھٹایا۔
یہ ضلعی گورنر کینر یلدز تھے۔ انہوں نے غامزے کے خاندان کوخوشخبری دی کہ ان کا سارا قرض مغلہ کے گورنر ایسنگول سیولک کے حکم پر ادا کردیا گیا ہے۔
