عمران فاروق قتل، 3 برطانوی گواہ 6 نومبر کو طلب

11 اکتوبر ، 2019

اسلام آباد کی انسدادِ دہشت گردی کی عدالت نے ڈاکٹر عمران فاروق قتل کیس میں 3 برطانوی گواہوں کو بیان ریکارڈ کرانے کے لیے 6 نومبر کو طلب کر لیا۔

اسلام آباد کی انسداد دہشت گردی کی عدالت کے جج شاہ رخ ارجمند نے ڈاکٹر عمران فاروق قتل کیس کی سماعت کی۔

ایف آئی اے کی جانب سے برطانیہ سے موصول شواہد بھی عدالتی اعتراض کے بعد گواہوں کی فہرست کے ساتھ دوبارہ عدالت میں پیش کر دیے گئے۔

ایف آئی اے پراسیکیوٹر خواجہ امتیاز عدالت میں پیش ہوئے جنہوں نے بتایا کہ برطانوی حکومت سے حاصل شواہد دوبارہ عدالت میں جمع کرا دیے گئے ہیں جن میں عمران فاروق قتل سے متعلق سی سی ٹی وی فوٹیج، آلۂ قتل، فرانزک رپورٹس، مقتول کی پوسٹ مارٹم رپورٹ، ریکوری میمو اور انویسٹی گیشن افسر سمیت 23 گواہوں کے بیانات بھی شامل ہیں۔

انہوں نے بتایا کہ 23 میں سے 3 برطانوی گواہان ذاتی حیثیت میں پیش ہو کر جبکہ 20 ویڈیو لنک کے ذریعے بیان ریکارڈ کرائیں گے۔

ذاتی حیثیت میں عدالت پیش ہونے والے گواہوں میں لندن میٹرو پولیٹن پولیس سروس کی کاؤنٹر ٹیررازم کمانڈ کے حکام شامل ہوں گے۔

یہ بھی پڑھیئے: عمران فاروق قتل، ایف آئی اے مکمل شواہد پیش کرے، عدالت

عدالت نے تینوں برطانوی گواہان کو بیان قلم بند کرانے کے لیے 6 نومبر کو طلب کرتے ہوئے سماعت ملتوی کر دی۔

اس سے قبل عدالت نے گواہوں کی فہرست جمع نہ کرانے پر برطانوی شواہد ایف آئی اے کو واپس کر تے ہوئے انہیں مکمل کر کے جمع کرانے کی ہدایت کی تھی۔

واضح رہے کہ ایم کیو ایم رہنما ڈاکٹر عمران فاروق کو 16 ستمبر 2010ء کو برطانوی دارالحکومت لندن کے ضلع ایجویئر میں تیز دھار آلے سے حملہ کر کے قتل کر دیا گیا تھا۔

تازہ ترین