فرمان الہی
نماز کے اوقات
کراچی کے مختلف علاقوں میں فائرنگ اور دیگر حادثات میں سے 3 افراد جاں بحق اور 2 زخمی ہوگئے، دو زوز قبل ڈیفنس سے اغواء ہونے والی لڑکی تاحال بازیاب نہیں ہوسکی ہے،جبکہ ایک ماہ قبل اغواء ہونے والا ٹرانسپورٹر بازیاب ہوگیا ہے۔
پولیس کے مطابق اورنگی ٹاؤن کے علاقے یعقوب آباد میں نامعلوم ملزمان کی گھر میں فائرنگ سے باپ بیٹا شدید زخمی ہوگئے، بعد ازاں 26 سالہ سمیع اللہ جان کی بازی ہارگیا جبکہ والد عبدالرقیب شدید زخمی ہے، ملزمان پیدل آئے اور پیدل ہی فرار ہوگئے۔
صفورہ چورنگی کے قریب فائرنگ سے 17 سالہ نوجوان نادر جاں بحق ہوگیا۔
ناصر جمپ کورنگی سے27 اکتوبر کو اغوا کئے گئے ٹرانسپورٹر کو شکار پور پولیس نے گڑھی تیغو سے ایک ماہ بعد بازیاب کرالیا، مغوی غلام مصطفیٰ کوریجو چکرا گوٹھ کا رہائشی ہے، اغوا کاروں نے رہائی کے لئے لاکھوں روپے تاوان مانگا تھا، تاہم مغوی اغواکاروں کے پاس سے فرار ہوکر قریبی پولیس اسٹیشن جا پہنچا۔
ڈیفنس بخاری کمرشل سے لڑکی کے اغواء اور نوجوان کے زخمی ہونے کے واقعے کے بعد پولیس ٹیم نے جائے وقوعہ کا دورہ کیا، پولیس کے مطابق اغواء کے مقام سے ملنے والا خول نائن ایم ایم کا ہے۔
ہوٹل کے ویٹر نے پولیس کو بیان دیا ہے کہ حارث اور دعا 4 ماہ سے مستقل چائے خانے آرہے تھے، کبھی کوئی ناخوشگوار واقعہ پیش نہیں آیا تھا، واقعے کا مقدمہ درخشان تھانے میں زخمی نوجوان حارث کے والد عبدالفتح کی مدعیت میں درج کیا گیا ہے۔
گلشن اقبال چورنگی کے قریب گاڑی کی موٹرسائیکل کو ٹکر سے ایک شخص جاں بحق جبکہ دوسرا زخمی ہوگیا۔
