فرمان الہی
نماز کے اوقات
کراچی(اسٹاف رپورٹر) چیف جسٹس آف پاکستان جسٹس گلزار احمد نے کہا ہے کہ سندھ جوڈیشل اکیڈمی سے عدلیہ کو بہت فائدہ ہوگا، اس اکیڈمی میں جوڈیشل افسران کی تربیت کی جائیگی، یہ اکیڈمی جوڈیشل افسران کیلئے ایک بڑا مرکز بننے جا رہی ہے، امید کرتا ہوں کہ جلد یہ اکیڈمی یونیورسٹی کی شکل میں تبدیل ہوجائیگی، سندھ اکیڈمی سے عدلیہ کو بہت فائدہ ہوگا۔ جمعہ کوسندھ جوڈیشل اکیڈمی سٹی کیمپس کی تقریب منعقد کی گئی۔سندھ جوڈیشل اکیڈمی سٹی کیمپس کی تقریب سنگ بنیاد میں مہمان خصوصی چیف جسٹس پاکستان جسٹس گلزار احمد، چیف جسٹس سندھ ہائیکورٹ جسٹس احمد علی ایم شیخ ،جسٹس مشیرعالم،جسٹس مقبول باقر،جسٹس فیصل عرب ،جج جسٹس عرفان سعادت خان، جسٹس فہیم صدیقی، جسٹس محمد علی مظہر بھی شریک ہوئے، تقریب میں چیف سیکرٹری ممتاز شاہ، اٹارنی جنرل انور منصور خان، ایڈووکیٹ جنرل سندھ سلمان طالب الدین، پراسیکیوٹر جنرل سندھ سید فیض شاہ سمیت سینئر وکلاء اور حکام نے سیمت اہم شخصیات شریک کی۔ چیف جسٹس سندھ ہائیکورٹ جسٹس احمد علی شیخ نے تقریب سے خطاب کے دوران کہا کہ چیف جسٹس پاکستان جسٹس گلزار احمد کی تقریب میں شرکت باعث مسرت ہے، ہمیں اس بات پر فخر ہے کہ چیف جسٹس کاتعلق سندھ ہائیکورٹ سے رہا ہے۔ یہ ادارہ جس مقصد کیلئے قائم کیا گیا ہے اسکے فوائد سب کو حاصل ہونگے۔ بعد ازاں چیف جسٹس سندھ ہائیکورٹ احمد علی شیخ نے چیف جسٹس پاکستان کو شال اور سندھی ٹوپی بطور تحفہ بھی پیش کیا۔
