فرمان الہی
نماز کے اوقات
کراچی میں ڈالمیا کے علاقے میں مسلح تالہ توڑ گروپ سرگرم ہوگیا، کھارادر اور شریف آباد سے 3 اسٹریٹ کرمنل گرفتار ہوگئے ،سرجانی ٹاؤن میں بیروزگاری سے تنگ ایک شخص نے پھندا لگا کر خودکشی کرلی جبکہ کورنگی نمبر ایک میں 2 موٹرسائیکلیں ٹکرانے سے 1 شخص جاں بحق جبکہ 2 زخمی ہوگئے۔
ذرائع کے مطابق بیروزگاری سے تنگ آکر سرجانی ٹاؤن خدا کی بستی میں 30 سالہ یوسف مسیح نے گلے میں پھندا لگاکر خودکشی کرلی، پولیس کا کہنا ہے کہ واقعے کی مزید تحقیقات کر رہے ہیں۔
عزیز بھٹی تھانے کی حدود ڈالمیاگلی نمبر 7 میں مسلح ڈکیت گروہ نے ہول سیل کنفیکشنری کی دکان تالے کاٹ کر لوٹ لی، 4 فروری کو رات ساڑھے 4 بجے پیش آنے والے واقعے کی سی سی ٹی وی جیو نیوز نے حاصل کرلی ہے ۔
فوٹیج میں 2ملزمان کو اسلحہ اور کٹر سمیت دیکھا جاسکتا ہے، ملزمان نے اسلحہ کے زور پر ایک شخص کو یرغمال بھی بنایا ہوا تھا، ملزمان نے دکان کے5 تالے کاٹے اور 2 لاکھ روپے کی نقد رقم اور سامان لوٹ کر فرار ہوگئے، جبکہ عزیز بھٹی پولیس ایک ہفتہ گزر جانے کے باوجود واقعے سے لاعلم رہے۔
کھارادر میں پولیس نے اسٹریٹ کرائم کی وارداتوں میں ملوث 2 ملزمان کو گرفتار کرکے اسلحہ، موبائل فون اور دیگر چیزوں سمیت گرفتار کرلیا، شریف آباد سے پولیس نے اسٹریٹ کرمنل کو اسلحہ،لوٹا گیا سامان اور نقد رقم سمیت گرفتار کرلیا۔
کورنگی نمبر ایک میں 2 موٹرسائیکلیں ٹکرانے سے 1 شخص جاں بحق جبکہ 2 افراد زخمی ہوگئے۔
