صدر مملکت سے کاروباری شخصیات کے وفد کی ملاقات

صدر مملکت عارف علوی سے کاروباری شخصیات کے وفد نے میاں منشا کی قیادت میں ملاقات کی۔

چیئرمین نشاط گروپ میاں محمد منشا نے صدر مملکت عارف علوی اور دیگر کاروباری شخصیات کے اعزاز میں عشائیہ دیا، ملاقات میں تاجروں اور کاروباری حضرات نے صدر مملکت کو سرمایا کاری اور معاشی نمو میں درپیش رکاوٹوں سے آگاہ کیا۔

اس موقع پر میاں محمد منشا نے کہا کہ کاروباری برادری ملکی معیشت کی اہم اسٹیک ہولڈر ہے، سرمایا کاروں کو محفوظ ماحول فراہم کرنے کی ضرورت ہے، تاکہ وہ کسی رکاوٹ کے بغیر ملکی معیشت کو آگے لے جانے کے لیے اپنی کوششیں جاری رکھ سکیں۔

انہوں نے کہا کہ کاروباری برادری کو ایسا ماحول فراہم کیا جائے کہ وہ ہراسانی، دھمکیوں اور بیوروکریٹک رکاوٹوں سے پاک ہو۔

صدر مملکت نے کاروبار ی حضرات کو حکومت کی جانب سے مکمل تعاون کا یقین دلایا اور کہا کہ کاروباری ماحول کو بہتر بنانے میں تاجروں کو ساتھ رکھا جائے گا۔