ارضِ پاکستان میں وہ ہے جس سے دنیا کما رہی ہے، شہر یار آفریدی

25 فروری ، 2020

وزیرِ مملکت برائے سیفران اور نارکوٹکس کنٹرول شہریار آفریدی کہتے ہیں کہ دنیا اب کسی اور جگہ چلی گئی ہے، پاکستان کی زمین میں وہ سب ہے جس سے باقی دنیا کما رہی ہے۔

یہ بھی پڑھیئے: رانا ثناء اللّٰہ ابھی بھی ملزم ہیں، شہریار آفریدی

کراچی کے مقامی ہوٹل میں چوتھی ٹرانس ریجنل کانفرنس کا انعقاد کیا گیا جس میں اینٹی نارکوٹکس فورس، پی ایم ایس اے سمیت غیر ملکی نمائندگان بھی شریک ہوئے۔

کانفرنس میں شرکت کے بعد میڈیا سے گفتگو میں شہر یار آفریدی کا کہنا تھا کہ افغانستان سے 85 فیصد منشیات دنیا کے مختلف ممالک تک جا رہی ہے۔

شہر یار آفریدی نے کہا کہ ہمارے تمام اداروں کا کردار بہت اہم رہا ہے، تاہم عالمی سطح پر پاکستان کی قربانیوں کو اس طرح سراہا نہیں گیا۔

انہوں نے کہا کہ والدین کو پتہ ہی نہیں کہ کونسی منشیات استعمال ہو رہی ہے، اس ضمن میں ایک ایپلیکشن کے ذریعے والدین کو آگاہی دی جا رہی ہے۔

یہ بھی پڑھیئے: چرس فیکٹری، مشاہد اللّٰہ کا شہریار آفریدی کے بیان پر ردِعمل

وزیرِ مملکت نے کہا کہ اے این ایف کا کردار قابلِ تحسین ہے، ہم بڑے بڑے لوگوں پر ہاتھ ڈال رہے ہیں، ہم سب دیکھتے ہیں کہ قوم کے بچے زندہ لاشوں کی طرح پڑے ہوئے ہیں۔

ان کا کہنا ہے کہ ریہیبلی ٹیشن سینٹرز کی ریگولیٹری اتھارٹی بنا رہے ہیں، عمران خان نیک نیتی سے کام کر رہے ہیں۔

وزیرِ مملکت نے کہا کہ دنیا کی قومیں اپنا مثبت چہرہ سب کے سامنے لاتی ہیں جبکہ بھارت کا چہرہ بری طرح سے دنیا کے سامنے آ رہا ہے۔

شہر یار آفریدی نے کہا کہ کل احمد آباد میں جو ہوا اس سے پوری دنیا کو ایک پیغام ملا ہے، ہم بھارت سے دشمنی نہیں چاہتے بلکہ چاہتے ہیں کہ بھارت قوانین کی پاسداری کرے۔

یہ بھی پڑھیئے: اپوزیشن کا شہریار آفریدی کے غیر سنجیدہ رویے پر واک آؤٹ

انہوں نے کہا کہ دنیا کی اعلیٰ قیادت اب پاکستان آتی ہے، تعلیمی اداروں میں سیمینارز اور سیشنز کے ذریعے آگاہی دی جا رہی ہے۔

وزیرِ مملکت کا مزید کہنا ہے کہ مختلف شعبوں کے لوگوں کو منشیات سے متعلق آگاہی میں شامل کیا جا رہا ہے، تعلیمی اداروں میں بچوں کو ایپلیکشن ڈاؤن لوڈ کرنے کا کہا جاتا ہے۔