آپ آف لائن ہیں
اتوار11؍شعبان المعظم 1441ھ 5؍اپریل 2020ء
Namaz Timing
  • بانی: میرخلیل الرحمٰن
  • گروپ چیئرمین و ایگزیکٹوایڈیٹر: میر جاوید رحمٰن
  • گروپ چیف ایگزیکٹووایڈیٹرانچیف: میر شکیل الرحمٰن
تازہ ترین
آج کا اخبار
کالمز

مکان کی قدر و قیمت بڑھانے والے عوامل

مکان کی تعمیر نو یا تزئین و آرائش پر کی جانے والی سرمایہ کاری ایک دانشمندانہ اقدام تصور کی جاتی ہے۔ لیکن ہم میں سے زیادہ تر لوگ ایسا صرف ضرورت کے تحت یا اپنے مکان کی خوبصورتی بڑھانے یا دوسروں کواپنے جمالیاتی ذوق سے متاثر کرنے کی خاطر کرتے ہیں ۔ عموماً تعمیر نو کا عمل گھرمیں ایک آدھ کمرے کےاضافے تک محدود ہوجاتاہے۔ 

تعمیراتی ماہرین کے مطابق گھر کی تزئین و آرائش کا مقصد اس کی خوبصورتی بڑھانے یا اضافی جگہ کے حصول سے زیادہ مکان کی قیمت (پراپرٹی ویلیو) میں اضافہ ہونا چاہیے کیونکہ یہ عمل مستقبل قریب میں گھر کو خوبصورت بنانے کے ساتھ اس کی مالیت بڑھانے میں بھی اہم کردار ادا کرے گا۔ اگر آپ جاننا چاہتے ہیں کہ مکان کی قیمت میں اضافےکی غرض سے تزئین و آرائش کے دوران کن عوامل کو مدِنظر رکھنا چاہیے تو آج کا مضمون اس حوالے سے مفید معلومات سمیٹے ہوئے ہے۔

بیسمنٹ میں تبدیلی

پراپرٹی کے حوالے سے ایک مشہور بین الاقوامی ویب سائٹ کی جانب سے جاری تعمیراتی گائیڈ کے مطابق مکان کی فروخت سے قبل بیسمنٹ میں کی جانے والی ہلکی پھلکی تبدیلی، اس کی قیمت میں 30فیصد اضافے کا سبب بنتی ہے۔لیکن اس کے لیے ضروری ہے کہ بیسمنٹ کی اسکوائر فٹ تعمیراتی لاگت اس علاقے کی اسکوائر فٹ لاگت سے کم ہو۔ لیکن حقیقت یہ ہے کہ مکان کی تزئین نو کے دوران بیسمنٹ کوگھر کے تمام حصوںمیں سب سے کم اہمیت حاصل دی جاتی ہے۔ 

چنانچہ آپ اپنے مکان کی قدر میں اضافے کی خاطر تزئین نو کے دوران دانشمندانہ فیصلے کریں۔ اگر آپ بیسمنٹ میں تبدیلی لانے کے لیے اسٹرکچر میں ردوبدل کرنے کے خواہشمند ہیں تو اس بارے میں تعمیراتی ماہرین سے لازمی مشورہ کریں کیونکہ کھدائی سے لے کراسٹرکچرل انجینئرنگ اور واٹر پروفنگ تک آپ کو ایک ماہر کی مدد درکار ہوگی۔ لہٰذا ایک ایسی پروفیشنل ٹیم کی مدد حاصل کریں جو آپ کو بہتر حل تجویز کرے اور آپ مستقبل میں کسی بھی قسم کی پریشانی سے بچ جائیں۔

لیونگ ایریا میں تبدیلی

کچھ لوگ مختلف وجوہات کی بنا پر گھر میں گیراج کو گاڑی کھڑی کرنے کے لیے استعمال نہیں کرتے رہے۔ ایسی صورت میں اسے لیونگ ایریا کے طور پر استعمال کیا جاسکتا ہے۔ پراپرٹی ویب سائٹ پر دیے گئے اعدادو شمار کے مطابق گیراج کی لیونگ ایریا میں تبدیلی مکان کی قدر وقیمت میں15فیصد اضافہ کا باعث بن سکتی ہے۔ 

ماہرین کے مطابق یہ مشورہ اس وقت اور زیادہ اہمیت اختیار کرجاتا ہے جب کار پارکنگ کے لیےآپ کے پاس متبادل ایریا موجود ہو۔ گیراج کی لیونگ ایریا میں تبدیلی کے لیےپہلے یہ دیکھنا ہوگا کہ گیراج میںکس قسم کی تبدیلی مناسب رہے گی مثلاًگیراج میںنکاسی آب، بجلی کی وائرنگ، دیوار یا چھتیں اس قابل بھی ہیں کہ وہ لیونگ ایریا میں تبدیلی کا بوجھ برداشت کرسکیں۔

کچن میں تبدیلی

پراپرٹی ویب سائٹ کے مطابق کچن میں تبدیلی لاکر یا دانشمندانہ طریقے سے جگہوں کااضافہ کرکے مکان کی قیمت میں15فیصد اضافہ ممکن بنایا جاسکتا ہے۔ اکثر گھروں میں کچن سے متصل ایک تنگ گلی بیکار سی محسوس ہوتی ہے، جسے مکین عموماً بیرونی حصے میں آنے جانے کے لیے استعمال کرتے ہیں۔ اگر آپ کے مکان میں بھی ایسی ہی کوئی گلی موجود ہے تو اسے قیمتی جان کر کچن کو توسیع دیں یا اسے کچن کا حصہ بنانے کے لیے سلائیڈنگ ڈور لگائیں۔ کچن سے متصل اس جگہ پر چند کرسیاں اور ایک چھوٹی میزرکھ کر آپ اسے چھوٹا سا ڈائننگ ایریا بنا سکتے ہیں۔ اس کے علاوہ ذیل میں درج باتوں پر بھی عمل کرنا ضروری ہے۔

٭ کچن میں سامان رکھنے کے لیے کیبنٹس یا درازیں استعمال میں آتی ہیں۔ زیادہ استعمال کے باعث ان کے ہینڈل جلدی پرانے ہوجاتے ہیں، چنانچہ ان کےہینڈل لازمی تبدیل کروائے جائیں۔ اگر بجٹ اجازت دے تو کچن کیبنٹس پر رنگ وروغن کروائیں، اس کے ذریعے بھی کچن کا لُک تبدیل کیا جاسکتا ہے ۔

٭ کچن میں موجودسنک کانل اگر پرانا ہوگیا ہے تو اسے بھی تبدیل کروادیں۔ کچن کا فرش اگر بوسیدہ سا لگ رہا ہے تو کچن میں رگس یا پلاسٹک بچھانے پر بھی غورکیاجاسکتا ہے ۔

بیڈروم میں تبدیلی

بیڈروم وہ جگہ ہے جہاں کوئی بھی شخص ایک مصروفیت بھرا دن گزارنے کے بعد پرسکون لمحات اور آرام کی غرض سے رُخ کرتا ہے۔یہی وجہ ہے کہ بیڈروم کی تعمیر نو یا تزئین و آرائش خاص توجہ اور احتیاط کی متقاضی ہوتی ہے۔ ایک پراپرٹی ایڈوائزرکے مطابق مکان فروخت کرنے سے قبل بیڈروم کو درست کرنے پر کی گئی سرمایہ کاری اس کی قیمت میں10فیصد اضافے کا باعث بنتی ہے۔ ماہرین بیڈروم میں فارسیلنگ اور دیواروں کی سجاوٹ کا مشورہ دیتے ہیں۔

٭ بیڈروم میں فارسیلنگ کے لیے ایسی مصنوعی چھتو ں کا انتخاب کیجیے جو آپ کے بجٹ پر گراں بھی نہ گزریں، ساتھ ہی بیڈروم کے لیے بہترین اضافہ ثابت ہوں مثلاً گلاس یا ووڈ سیلنگ کے بجائے فلورل یا وال پیپر سیلنگ کا انتخاب متاثر کن رہے گا۔

٭ بیڈروم یا گھر کے دیگر کمروں کی تمام دیواروں کا رنگ و روغن تبدیل کرنے کے بجائے کسی ایک دیوار کا رنگ وروغن تبدیل کرنے سے گھرکی خوبصورتی بڑھائی جاسکتی ہے۔

بیرونی حصے میں تبدیلی

گھر کا خوبصورت بیرونی حصہ یا لینڈ اسکیپنگ آپ کے گھر کی قدروقیمت 10فیصد تک بڑھا سکتا ہے۔ لہٰذا مکان فروخت کرنے سے قبل باغیچے کی تزئین پرتوجہ دیں اور اس میں کچھ ضروری تبدیلیاں لانے کی کوشش کریں مثلاًپھل، پھول، درختوں اور سبزیوں کے قطعے بنانا، پلے ایریا کا اضافہ، سٹنگ ایریا وغیرہ کا انتظام کرنا۔ دوسری جانب پورچ ایریا میں سن روم کی تعمیر کے ذریعے بھی گھر کے بیرونی حصے کی شکل تبدیل کی جاسکتی ہے۔

تعمیرات سے مزید