کورونا وائرس عالمگیر وبا ہے، طاہر القادری

15 مارچ ، 2020

ڈاکٹر طاہر القادری نے کہا ہے کہ کورونا وائرس عالمگیر وبا ہے جس نے پوری دنیا کو متاثر کیا ہے، کورونا وائرس سے خود کو اور دوسروں کو محفوظ بنانا ناگزیر ضرورت ہے۔

ان خیالات کا اظہار انہوں نے کورونا وائرس پر مشاورتی کونسل کے اجلاس سے خطاب کرتے ہوئے کیا۔

ڈاکٹر طاہر القادری کا کہنا تھا کہ عامۃ الناس کورونا وائرس کی روک تھام کیلئے حکومتی ہدایات پر عمل کریں، خوفزدہ ہونے کی ضرورت نہیں تاہم ہدایات کو نظر انداز ہر گز نہ کریں۔ نبی کریمؐ نے وبا سے متاثرہ علاقوں میں آمدورفت اور میل ملاپ سے منع کیا۔

انہوں نے کہا کہ بیماریوں سے بچنے کے لیے تدابیر اختیار کرنے کا حکم ﷲ اور اس کے رسول ؐ نے سختی سے دیا، ایسی آفات پر قرآن و سنت اور نبوی تعلیمات سے ہدایات اور رہنمائی ملتی ہے۔ احتیاط اور تدابیر کو نظر انداز کرنے والا ﷲ اور اس کے رسول کو پسند نہیں۔

ڈاکٹر طاہر القادری کا کہنا تھا کہ فرمان رسول ؐ ہے کہ جس خطے میں وبا پھیل جائے وہاں ہر گز مت جاؤ، سوسائٹی کا ہر فرد ایسی آفات کی آمد پر اپنا ذمہ دارانہ سماجی کردار ادا کرے، عامۃ الناس ملکی و بین الاقوامی ہیلتھ آرگنائزیشن کی تجویز کردہ احتیاطی تدابیر پر عمل کریں۔

تازہ ترین