کورونا: 6 افراد جاں بحق، متاثرین کی تعداد 884 ہوگئی

23 مارچ ، 2020

پاکستان میں کورونا وائرس سے جاں بحق افراد کی تعداد 6 ہوگئی، مہلک وائرس سے 884 افراد متاثر ہوچکے ہیں۔

ملک بھر میں آج مزید 88 کیسز رپورٹ ہوئے، جن میں سے سندھ 42، پنجاب میں 24، گلگت بلتستان میں9، خیبرپختونخوا میں 7، اسلام آباد میں 4، اور بلوچستان میں 2 افراد کورونا وائرس کا شکار بنے۔

پاکستان میں کورونا وائرس سے صحتیاب ہونے والوں کی تعداد بھی 6 ہے جن میں 4 کا تعلق سندھ اور 2 اسلام آباد سے ہیں۔

ملک میں مہلک وائرس سےجان کی بازی ہارنے والوں میں سے خیبرپختونخوا کے 3 جبکہ سندھ ،گلگت بلتستان اور بلوچستان سے 1،1 فرد شامل ہے۔

پنجاب میں مرض کے متاثرین کی مجموعی تعداد 246 تک پہنچ گئی ہے، وزیراعلیٰ عثمان بزدار کے مطابق ڈیرہ غازی خان میں 177، لاہور میں52، گجرات میں4، گجرانوالہ میں4، جہلم میں3، راولپنڈی اور ملتان میں 2،2 جبکہ سرگودھا میں 1 شخص کورونا وائرس سے متاثرہ ہے۔

سندھ میں کل کیسز کی تعداد 394 تک پہنچ گئی ہے، تفتان سے سکھر آنے والے متاثرہ زائرین کی تعداد 260 ہوچکی ہے جبکہ کراچی میں کورونا متاثرین کی تعداد 132 ہوچکی ہے، حیدر آباد اور دادو سے بھی ایک ایک مریض سامنے آچکا ہے۔

ترجمان سندھ حکومت کے مطابق اب تک صوبے میں صحتیاب ہونے والے 4 مریضوں کا تعلق کراچی اور ایک کا حیدرآباد سے ہے جبکہ کراچی سے تعلق رکھنے والا ایک مریض جان کی بازی ہار چکا ہے۔

خیبرپختونخوا میں مریضوں کی مجموعی تعداد 38 ہے، جن میں سے ڈی آئی خان سے 16، پشاور 10، مردان 6، مانسہرہ 3، بونیر، چارسدہ اور کرک سے ایک ایک متاثرہ شخص سامنے آچکا ہےجبکہ صوبے میں اب تک 3 افراد جان کی بازی ہار چکے ہیں۔

بلوچستان میں مجموعی طور پر 110 افراد میں کورونا وائرس تشخیص ہوا ہے آج کوئٹہ کے فاطمہ جناح اسپتال میں زیر علاج 66 مریض انتقال کرگیا۔

گلگت بلتستان میں متاثرہ کیسز کی تعداد 80 تک پہنچ گئی، جن میں 25 کی کوئی ٹریول ہسٹری سامنے نہیں آئی ہے، متاثرہ افراد کو آئسولیشن سینٹر منتقل کردیا گیا ہے۔