جرمنی، کورونا کی ممکنہ ویکسین کے ٹرائلز کی منظوری

22 اپریل ، 2020

جرمنی میں پہلی مرتبہ نئی قسم کے کورونا وائرس کی ایک ممکنہ ویکسین کی انسانوں پر آزمائش کی اجازت دے دی گئی ہے۔

کلینیکل ٹرائلز کے لیے منظوری حاصل کرنے کے سلسلے میں یہ دنیا میں اپنی نوعیت کی صرف چوتھی ویکسین ہے۔

جرمنی کے وفاقی انسٹیٹیوٹ برائے ویکسین نے کہا ہے کہ اس نے جرمنی میں COVID-19 کی ایک ممکنہ ویکسین کے کلینیکل ٹرائلز کے لیے منظوری دے دی ہے۔

BNT162 نامی ویکسین کے انسانوں پر ٹیسٹ کے ابتدائی مرحلے میں اٹھارہ سے پچپن سال کی عمر کے دو سو صحت مند افراد کو مختلف مقدار میں دوائیوں کی خوراک دی جائے گی, دوسرے مرحلے میں خطرے سے دوچار افراد پر توجہ مرکوز کی جائے گی۔

جرمنی کے پاؤل ایرلش انسٹیٹیوٹ ’پی ای آئی‘ نے بتایا ہے کہ جرمن شہر مائنز کی ایک کمپنی Biontech ’بیون ٹیک‘ یہ ویکسین تیار کر رہی ہے۔ انسٹیٹیوٹ کے مطابق بیون ٹیک دنیا بھر میں کورونا وائرس کی ویکسین کے ٹیسٹ کے لیے منظوری حاصل کرنے والی چوتھی امیدوار ہے۔