فرمان الہی
نماز کے اوقات
وفاقی وزیر منصوبہ بندی اسد عمر نے کہا ہے کہ کل کے حالات دیکھ کر ایسا لگا جیسے لاک ڈاؤن میں نرمی کا نہیں بلکہ کورونا وائرس کے ختم ہونے کا اعلان کردیا گیا ہو۔
ان خیالات کا اظہار انہوں نے ٹائیگرفورس کے رضاکاروں سے خطاب کرتے ہوئے کیا۔
وفاقی وزیر منصوبہ بندی کا کہنا تھا کہ حکومتی وسائل اتنے نہیں کہ اکیلے کورونا وبا سے لڑ سکیں۔
اسد عمر کہنا تھا کہ عوام کو مشکل وقت میں ذمہ داری کا مظاہرہ کرنا ہے۔
انہوں نے کہا کہ کل جو حالات تھے ایسا لگا جیسے لاک ڈاؤن میں نرمی کا نہیں بلکہ کورونا ختم ہونے کا اعلان کیا ہو۔
ان کا کہنا تھا کہ ڈاکٹر صاحبان نے جو احتیاطی تدابیر بتائی ہیں ان پر عمل کیا جائے۔
اسد عمر نے کہا کہ اگر بےاحتیاطی کی گئی تو مجبوراً دوبارہ بندشیں بڑھائی جائیں گی۔
وفاقی وزیر نے کہا کہ امید ہے کہ شہری کورونا کی صورتحال کو سمجھیں گے۔ ان کا کہنا تھا کہ عید کی تیاری ضرور کریں مگر حفاظت بھی کریں۔
وفاقی وزیر نے ٹائیگر فورس کے رضاکاروں کو خراج تحسین بھی پیش کیا اور کہا کہ سارا پاکستان اس وقت متحد ہے۔
واضح رہے کہ عالمی وبا کورونا وائرس کے پیش نظر ملک بھر میں جاری لاک ڈاؤن میں نرمی کے فیصلے کے بعد ملک کے بڑے چھوٹے شہروں میں مارکیٹیں کھل گئیں اور خریدار پہنچنا شروع ہو گئے ہیں تاہم کورونا وائرس سے بچاؤ کے لیے احتیاطی تدابیر نظر انداز کی جارہی ہیں۔
ماہرین کا کہنا ہے کہ کورونا وائرس سے متعلق ایس او پیز پر عمل نہ کیا گیا تو ملک میں کورونا کیسز کی تعداد میں تیزی سے اضافہ ہوسکتا ہے۔
