پلاٹ الاٹمنٹس کیس: وزیرِ اعظم کے پرنسپل سیکریٹری کو دوبارہ نوٹس جاری

26 جون ، 2020

اسلام آباد ہائی کورٹ نے پلاٹ الاٹمنٹس کیس میں وزیرِ اعظم عمران خان کے پرنسپل سیکریٹری اعظم خان کو دوبارہ نوٹس جاری کرتے ہوئے ان سے جواب طلب کر لیا۔

اسلام آباد ہائی کورٹ کے جسٹس محسن اختر کیانی نے آؤٹ آف ٹرن پلاٹس کی الاٹمنٹ کی درخواست پر سماعت کی۔

اعظم خان کی جانب سے کسی کے پیش نہ ہونے پر عدالت نے انہیں دوبارہ نوٹس جاری کر دیے ہیں۔

سیکریٹری پلاننگ ظفر حسن اور سابق سیکریٹری شفقت جلیل نے عدالت میں جواب جمع کرا دیا جبکہ عدالتِ عالیہ نے 7 بیورو کریٹس کو جواب جمع کرانے کی ہدایت کر دی۔

جسٹس محسن اختر کیانی نے سی ڈی اے کے نمائندے سے سوال کیا کہ کیا سی ڈی اے نے یہ پلاٹ پیدا کیے؟

سی ڈی اے کے وکیل نمائندے نے عدالت کو جواب دیا کہ پلاٹ پیدا نہیں کیے۔

جسٹس محسن اختر کیانی نے ہدایت کی کہ سی ڈی اے کا جو بھی مؤقف ہے لکھ کر دے دیں۔

یہ بھی پڑھیئے:۔

وزیرِ اعظم لا علم، با اثر بیورو کریٹس نے اربوں کی زمین الاٹ کرا لی

سی ڈی اے کرپٹ ترین اداروں میں سے ایک ہے‘چیف جسٹس

اسلام آباد ہائی کورٹ نے سیکریٹری ایوی ایشن ڈویژن حسن نثار، سیکریٹری سیفران محمد اسلم، سیکریٹری پیٹرولیم، ممبر کسٹم جاوید غنی، ممبر لیگل ایف بی آر فضل یزدانی، اسٹیبلشمنٹ ڈویژن کے افسر اعجاز شاہ واسطی، فیڈرل گورنمنٹ ایمپلائز ہاؤسنگ اتھارٹی، سی ڈی اے اور وزارتِ ہاؤسنگ کو بھی جواب جمع کرانے کی ہدایت کر دی۔

عدالتِ عالیہ نے سابق سیکریٹری ابو عاکف کی آؤٹ آف ٹرن پلاٹس کی الاٹمنٹ کی درخواست پر سی ڈی اے سے ریکارڈ طلب کر لیا۔

تازہ ترین