جیکب آباد میں مستحق کھلاڑیوں میں راشن بیگز کی تقسیم

کورونا وائرس سے جہاں دنیا بھر میں اموات کا نہ رکنے والا سلسلہ تسلسل کے ساتھ جاری ہے وہیں عالمی معیشت بھی اپنی سوسالہ تاریخ کے بدترین بحران کاشکار ہے کاروبار کی بندش کے باعث اب تک کروڑوں افراد اپنی ملازمت سے فارغ ہوگئے ہیںاس موذی وائرس کی وجہ سے دنیا میں انسانی زندگی تقریبا مفلوج ہوکررہ گئی ہے موجودہ حالات میں جہاں سرمایہ دار طبقہ اس غم میں مبتلا ہے کہ اپنے کاروبار کو مزیدنقصان سے بچانے کیلئے کیا اقدامات کرے تو وہیں اب غریب کے ساتھ ساتھ متوسط طبقے کوبھی دووقت کی روٹی کمانے کی فکرلاحق ہے موجودہ صورحال میں پاکستان جیسے ملک جہاں غربت نے پہلے ہی اپنے ڈیرے ڈالے ہوئے ہیں اور کورونا کے تیزی کے ساتھ پھیلنے سے بیک وقت کئی بحرانوں نے جنم لے لیا ہے وہیں اس کے منفی اثرات سے کھیل کے میدان اورکھلاڑی بھی محفوظ نہیں رہ سکے ہیں۔ 

کورونا وائرس کی وجہ ہونے والے لاک ڈاؤن کے باعث کھیلوں کی سرگرمیاں منجمند ہونے اور میدانوں کے ویران ہونے کا براہ راست اثر کھیل سے وابستہ کھلاڑیوں، آرگنائزرزاور گراؤنڈ اسٹاف کوہوا ہے آزمائش کی اس گھڑی میں کراچی اسپورٹس فورم نے مشکلات سے دوچار کھلاڑیوں،کوچز، امپائرز اور اسپورٹس آرگنائزر کی داد رسی کرتے ہوئے ان کے گھروں میں راشن بیگز،فیس ماسک،سینیٹائزر اور دیگراشیاء فراہم کرنے کابیڑا اٹھایا۔ 

کراچی میں ایک ہزار سے زائد مستحق خاندانوں میں راشن کی تقسیم کے بعد کے ایس ایف نے خدمت خلق کے اس کارخیر کے سلسلے کو اندرون سندھ تک وسیع کردیا جس کیلئے سید فاؤنڈیشن نے اپنا تعاون فراہم کیا اس ضمن میں جیکب آباد میں وفاقی وزیر برائے نجکاری محمدمیاں سومرو کی رہائش گاہ پر جیکب آباد، سکھر اور لاڑکانہ میں کورونا وائرس اور لاک ڈاون سے متاثر ہ کھلاڑیوں اورگراونڈاسٹاف اور مستحق خاندانوں میں 400راشن بیگز تقسیم کئے گئے تقریب میں ہاکی، جوڈو، جمناسٹک، باکسنگ،ملاکھڑا، کوڈی کوڈی، ونجھ وٹی، سافٹ بال، کراٹے، تائیکوانڈو،جوجسٹوایسوسی ایشنز کے نمائندوں سمیت جیکب آباد میں سومرو ہاؤس کے مینیجر راشد احمد کلہوڑو، سید فاؤنڈیشن کے نمائندے فراز اعجاز، کراچی اسپورٹس فورم کے خلدون راجہ، عبدالسبحان اور ذوالفقار احمد نے شرکت کی اس ضمن میں سید فاؤنڈیشن کے صدر سید وسیم ہاشمی کاکہنا تھا کہ ہم وفاقی وزیر محمدمیاں سومرو اور ان کی فیملی کے شکرگذار ہیں پانچویں مرحلے میں حیدرآباد، میرپورخاص اور شہید بینظیرآباد سے تعلق رکھنے والے مستحق کھلاڑیوں اور گراؤنڈ اسٹاف کی فیملیز کیلئے راشن بیگزکی تیاریوں کے کام کاآغازکردیا گیا ہے ۔