آپ آف لائن ہیں
منگل13؍ذی الحج 1441ھ 4؍اگست 2020ء
  • بانی: میرخلیل الرحمٰن
  • گروپ چیئرمین و ایگزیکٹوایڈیٹر: میر جاوید رحمٰن
  • گروپ چیف ایگزیکٹووایڈیٹرانچیف: میر شکیل الرحمٰن
Jang Group

طارق میر نے پراپرٹی الطاف حسین کو منتقل کرنے سے انکار کردیا

لندن (مرتضیٰ علی شاہ) متحدہ قومی موومنٹ کے فنانس سیکرٹری سید احمد طارق میر نے ایم کیو ایم کے بانی کے یہ الزامات مسترد کردیئے ہیں کہ انھوں نے سوسائٹی فار ان ویل اینڈ نیڈی (سن) چیرٹی کے نام پر خریدے گئے فلیٹ پر قبضہ کر رکھاہے اور طارق میر نے یہ پراپرٹی رہائش کیلئے شمائلہ عمران فاروق کے حوالے کرنے سے انکار کردیا ہے۔

ایم کیو ایم کے بانی نے اپنی تازہ ترین تقریر میں الزام عائد کیا ہے کہ طارق میر نے مبینہ طورپر برنٹ اوک براڈوے کے نزدیک ہسپتال کے بالمقابل واقع سن چیرٹی کے فلیٹ پر قبضہ کر رکھا ہے۔

طارق میر نے کہا ہے کہ انگلینڈ اور ویلز کے چیرٹیز سے متعلق قوانین کے تحت کسی چیرٹی کے نام خریدی گئی املاک کو کسی فرد کے نام منتقل نہیں کیا جاسکتا اور اسے فلاحی مقاصد کے علاوہ کسی اور مقصد کیلئے استعمال بھی نہیں کیا جاسکتا۔

طارق میر نے کہا ہے کہ الطاف حسین جس فلیٹ کے بارے میں بات کر رہے ہیں، وہ بہت چھوٹا ہے اور فیملی کیلئے مناسب نہیں ہے، کیونکہ یہ دکانوں کے اوپر ہے اور غیر محفوظ جگہ ہے۔ الطاف حسین کے یہ الزامات طارق میر کی جانب سے شمائلہ عمران فاروق کا کیس ایک مقامی عدالت میں لے جانے کے بعد سامنے آئے ہیں، جس میں عدالت کو بتایاگیا ہے کہ وہ 221 وہٹ چرچ لین کی پراپرٹی شمائلہ فاروق اور ان کے 2 بیٹوں کو منتقل کرنا چاہتے ہیں۔

ڈاکٹر عمران فاروق کی بیوہ ان دنوں ایک بیڈ روم کے ایک فلیٹ میں اپنے 2 بیٹوں کے ساتھ مقیم ہیں۔ انھیں کینسر ہے اور انھوں نے اس بات کی تصدیق کی ہے ایم کیو ایم لندن یا پاکستان کے دھڑے ان کی عملی کوئی مدد نہیں کررہے ہیں اور مدد کے بارے میں صرف بیانات دے رہے ہیں۔

شمائلہ حکومت کی جانب سے دی جانے والی امداد پر زندگی گزار رہی ہیں اور ان کے دونوں بیٹے عالی شان اور وجدان سرکاری اسکول میں زیر تعلیم ہیں۔ پاک سرزمین پارٹی کے مصطفیٰ کمال نے زبانی طورپر شمائلہ اور ان کے بیٹوں کی حمایت کرتے ہوئے ان کو انصاف فراہم کرنے کا مطالبہ کیا تھا لیکن ایم کیو ایم پاکستان اس معاملے پر بالکل خاموش ہے۔

10سال قبل عمران فاروق کو قتل کئے جانے کے وقت الطاف حسین نے وعدہ کیا تھا کہ وہ ڈاکٹر عمران فاروق کی اہلیہ اور ان کے بچوں کی عمر بھر کفالت کریں گے، اگرچہ لندن کی 8 قیمتی پراپرٹیز الطاف حسین کے کنٹرول میں ہیں لیکن انھوں نے شمائلہ عمران فاروق کو پناہ دینے سے انکار کردیا ہے جبکہ مخصوص نشستوں پر منتخب کی جانے والی ایم کیو ایم کی سابق رکن سندھ اسمبلی شمائلہ فاروق گزشتہ 10سال سے انتہائی مخدوش صورت حال میں خاموشی سے گزارا کر رہی ہیں۔

پہلے گرپڑنے کی وجہ سے انھیں فریکچر ہوگیا تھا اور اب وہ کینسر کے سنگین مرض میں مبتلا ہیں۔ وہٹ چرچ لین میں، جہاں ایم کیو ایم لندن کی رابطہ کمیٹی کے ارکان رہتے ہیں۔

طارق میر اور محمد انور کی ان کے اپنے نام پر دو پراپرٹیز ہیں لیکن انھوں نے یہ دونوں پراپرٹیز الطاف حسین کے نام منتقل کرنے سے انکار کردیا ہے۔

دنیا بھر سے سے مزید