کچھ فلموں سے اقربا پروری کی وجہ سے ہاتھ دھونا پڑا، تاپسی پنوں

04 جولائی ، 2020

بھارتی اداکار ہ تاپسی پنوں نے انکشاف کیا ہے کہ بھارتی انڈسڑی میں اقربا پروری کا رجحان پائے جانے کی وجہ سے اُنہیں بہت سی فلموں سے ہاتھ دھونا پڑا ہے ۔

حال ہی میں خودکشی کرنے والے بھارتی اداکار سوشانت سنگھ کی موت کی وجہ بھارتی انڈسٹری میں اقرباپروری کلچر کو ٹھہرایا جا رہا ہے جس کے خلاف نامور فنکار آواز اٹھا رہے ہیں ، متعدد فنکاروں کے بعد اب بھارتی انڈسٹری میں باہر سے آکر اپنا کام اور نام منوانے والی اداکارہ تاپسی پنو نے بھی انکشاف کیا ہے کہ اقرباپروری ’ نیپوٹزم‘ کی وجہ سے انہیں بھی کئی فلمیں نہیں مل سکیں۔

بھارتی ویب سائٹ ’ ہندوستان ٹائمز ‘ کو انٹرویو کے دوران فلم ’ تھپڑ‘ کی ہیروئن تاپسی پنوں نے کہا کہ ’ بالی ووڈ میں اقربا پروری کا رجحان پایا جاتا ہے جس کے سبب انہیں بھی اپنے کیریئر کے آغاز ہی میں کئی فلموں سے ہاتھ دھونا پڑا، وہ اس رویئے سے بہت پریشان اور دلبرداشتہ بھی ہوئی تھیں۔‘

تاپسی پنوں نے کہا ہے کہ ’ فلم میں کام دینے سے پہلے دیکھا جاتا ہے کہ آپ انڈسٹری کے اندر سے ہیں یا باہر شہر سے آئے ہیں، اگر آپ کا تعلق کسی معروف فلمی گھرنے سے ہے تو آپ پر اور آپ کی صلاحیتوں پر اعتماد کیا جاتا ہے اور اگر فلم انڈسٹری میں باہر سے آئے ہیں اور آپ کا کوئی جاننے والا بھی نہیں ہے تو آپ کی صلاحیتوں پر بھروسہ نہیں کیا جاتا ۔‘

تاپسی نے کہا کہ اگر آپ اسٹار کڈز ہوں اور آپ کی پہلی فلم ریلیز کی جائے تو شائقین دیکھنا چاہتے ہیں وہ پہلے سے ٹکٹس خرید لیتے ہیں اور سینما میں آپ کو دیکھنے کی خواہش رکھتے ہیں ، باہر سے آنے والے فنکار جنہیں کوئی نہیں جانتا اُن کی فلموں کی ٹکٹس کی بکنگ پہلے سے کوئی نہیں کرواتا، انہیں شائقین سینما میں آکر دیکھنے میں دلچسپی ہی نہیں رکھتے ۔

انہوں نے کہا کہ اگر آپ کسی فلمی گھرانے میں پیدا ہوئے ہیں تو آپ کی منزل آسان ہوتی ہے مگر باہر سے آنے والوں کے لیے ایسا نہیں ہے ، باہر سے آنے والوں کو بہت محنت سے نام کمانا پڑتا ہے جو کہ نا ممکن نہیں ہے مگر آسان بھی نہیں ہے ، اپنا نام بناتے ہوئے اور کام ملنے میں بہت وقت لگتا ہے ۔

32 سالہ تاپسی پنو کا کہنا تھا کہ اگر آپ باہر سے آئے ہیں اور اس انڈسٹری میں نام بنانے میں کامیاب ہو گئے ہیں تو اس بات کی خوشی ہوتی ہے کہ آپ نے جو کچھ بھی حاصل کیا اپنے بل بوتے پر کیا ہے ، کوئی آپ کو دیکھ کر یہ نہیں کہہ سکتا کہ فلانے انسان نے اسے یہاں تک پہنچایا ہے یا فلانے انسان کی وجہ سے اسے اس فلم میں کام ملا ۔

تاپسی پنوں کا کہنا تھا کہ فلم انڈسٹری کے باہر سے آکر اپنا نام بنانے میں ہی اُن کی سب سے بڑی کامیاب ہے اور یہی اُن کی طاقت ہے ، شائقین اسٹار کڈز کے بجائے اُن فنکاروں کو زیادہ پسند کرتے ہیں جو محنت سے اور بغیر کسی جان پہچان اور رشتے داروں کے اپنے کام سے خود کو منواتے ہیں۔

تازہ ترین