وہ ایک شاعر ’’ناصر زیدی‘‘

آج کا اخبار

ادارتی صفحہ

12 جولائی ، 2020

سیّد ناصر زیدی 3جولائی 2020 کو اسلام آباد میں انتقال فرماگئے۔ سیّدناصر زیدی کسی تعارف کے محتاج تو نہیں ہیں مگر پھر بھی یہاں اُن کا مختصر تعارف کرانا ضروری سمجھتی ہوں۔ ناصر زیدی شاعر ہونے کے ساتھ ساتھ محقق، کالم نگار، مدیر، ٹی وی اور ریڈیو کے جانے پہچانے کمپیئر تھے۔ اُنہوں نے ابتدائی تعلیم پاکستان ہائی اسکول موہن پورہ راولپنڈی سے حاصل کی۔ پانچویں جماعت میں تھے کہ وہ ماڈل ٹائون لاہور آگئے۔ گورنمنٹ ہائی اسکول وحدت کالونی سے میٹرک کا امتحان نمایاں حیثیت سے پاس کیا۔ ایف اے اسلامیہ کالج ریلوے روڈ سے کیا۔ اسلامیہ کالج سول لائنز سے بی اے اور پنجاب یونیورسٹی اورینٹل کالج میں ایم اے اُردو میں داخلہ لیا۔

ناصرزیدی کے بچپن کے دوست عطاء الحق قاسمی تھے جس کے ساتھ اُنہوں نے اپنا بچپن گزارا۔ وہ بارہ تیرہ برس کے تھے کہ اُنہوں نے اپنے بچپن کے دوست عطاء الحق قاسمی کے ساتھ آٹھویں نویں کلاس ہی میں خود کو باقاعدہ شاعر کہلوانا اور سمجھنا شروع کردیا تھا۔ وہ خود بتایا کرتے کہ اُنہوں نے کبھی بھی نوکری کے لیے کہیں بھی تحریری درخواست نہیں دی تھی۔ ناصرزیدی نے آج تک جتنے بھی کام کیے سب زیادہ تر ادب و صحافت سے متعلق تھے۔ وہ 18کے قریب رسائل و جرائد کے ایڈیٹر رہے۔ اُنہوں نے اُنیسویں گریڈ میں ’’سپیچ رائٹر ٹو دی پرائم منسٹر‘‘ کے طور پر مختلف وزرائے اعظم کے ساتھ بارہ سال گزارے۔ اس کے علاوہ ٹی وی، ریڈیو پر مشاعروں کی نظامت اور ہمہ جہت آئوٹ اسٹینڈنگ ٹیلنٹ کے طور پر وابستگی رہی۔ انہوں نے نیوزکاسٹر اور براڈکاسٹر کے فرائض بھی انجام دئیے۔ ناصرزیدی نے ریڈیوپاکستان میں متنوع کام کیا۔ انہیں آڈٹ اٹینڈنگ کیٹگری کے طور پر کئی اعزازات اور ایوارڈز سے بھی نوازا جا چکا ہے۔

ریڈیوپاکستان کے ’’یادِ باغ‘‘ میں اُن کے ہاتھ سے لگایا ہوا پودا آج بھی اپنی ایستادہ حالت میں سرسبزو شاداب ہے۔ وہ ان دنوں ادبِ لطیف کے مدیراعلیٰ تھے اور اس ماہ اس رسالے کی سرپرست صدیقہ بیگم کا نمبر نکال رہے تھے۔ جبکہ اگلے ماہ احمدفراز کی سالگرہ پر ان کے نمبر کی بھی تیاریاں زوروشور سے جاری تھیں۔ افسوس ان کو موت نے مہلت نہ دی۔ اُن کی تصانیف میں ’’ڈوبتے چاند کا منظر‘‘، ’’وصال‘‘، ’’التفات‘‘ اُن کے شعری مجموعے ہیں۔ ان کے علاوہ وہ ڈیڑھ درجن مختلف کتب کے مؤلف اور مرتب رہے۔ جن میں ’’وہ رہبر ہمارا وہ قائد ہمارا‘‘ اور علامہ اقبال کے بارے میں ’’بیادِ شاعر مشرق‘‘ خاص طور پر قابل ذکر ہیں۔

ناصرزیدی صاحب سے ہمارے خاندان یعنی صوفی تبسم (دادا) سے پوتی تک کا سفر کئی دہائیوں پر محیط ہے۔ وہ ہمارے گھر اکثر آتے اور داداجان سے گفتگو کرتے کاغذات کا تبادلہ ہوتا اور وہ چلے جاتے۔ داداجی کے زمانے سے ناصرزیدی صاحب کے حوالے سے یادداشت میں ایسے ہی چند لحظات جھلملاتے نظر آتے ہیں۔ وہ داداجان کی وفات کے بعد میرے چچا پروفیسر صوفی نثار احمد اور میرے والد محترم پروفیسر صوفی گلزاراحمد سے بھی اکثر ملتے رہتے۔ صوفی تبسم کی شخصیت فن اور تحاریر کے حوالے سے میرے بزرگوں سے ملاقات کے دوران مسلسل اُن کی معاونت کرنے کا کام بھی ناصرزیدی صاحب سرانجام دیا کرتے تھے۔ انہوں نے صوفی تبسم اکیڈمی کے حوالے سے ہمیشہ اچھی تجاویز بھی دیں یوں اس خانوادے سے اُن کا تعلق مزید ہماری سمجھ میں آتا چلا گیا۔ ناصرزیدی صاحب سے جب میری ملاقات ہوئی تو میں بھی افسانے اور شاعری لکھ رہی تھی۔ انہوں نے میرے والد کی طرح مجھے بے حد محبت اور پیار سے میری سرپرستی کی اور اُردو کے تلفظ سے لے کر اُردو کی تحریروں میں بھی کئی مرحلوں پر میری رہنمائی فرمائی۔ میری افسانوں کی کتاب ’’حیرت و مستی‘ کا دیباچہ بھی اُنہوں نے تحریر کیا۔ وہ میری بولڈ تحریروں پر بعض اوقات حیران بھی ہوتے۔ شاعری کی کتاب ’’لیکن جانا پار تو ہے‘‘ کا فلیپ بھی اُنہوں نے ہی تحریر کیا۔ پھر کئی برسوں کا سفر یوں بھی گزرا کہ وہ بھی ریڈیوپاکستان لاہور بہت سے پروگرام کرتے خاص طور پر ’’تخلیق‘‘ جس کی پروڈیوسر عفت علوی صاحبہ تھیں اور میں فوجی بھائیوں کا پروگرام ’’پاسبان‘‘ کیا کرتی کئی مواقع ایسے بھی آئے جب مجھ ناچیز کو اُن کی صدارت میں منعقدہ مشاعروں میں اپنی شاعری پڑھنے کا اعزاز حاصل ہوا۔

وہ موت سے واقعی نہیں ڈرے اور اپنے بیٹے عدیل ناصر زیدی سے باتیں کرتے کرتے اپنی جان جانِ آفرین کے سپرد کردی اُن کا چہرہ آج بھی بارعب تھا وہ تازہ دم مسکراتے کھلتے چہرے کے ساتھ خاک کی آغوش میں چلے گئے بالکل ویسے جیسے ماں اپنے شیرخوار بچے کو اپنی گود میں لے لیتی ہے۔

ناصر زیدی صاحب کے لیے الوداعیہ کلمات میں اپنے جذبات کا اظہار

’’وہ ایک شاعر‘‘

وہ ایک شاعر کہ مدتوں تک مجھے رہا انتظار جس کا

کہ میں یہ دیکھوں

بھلا کوئی کس طرح سے آخر

سمیٹ لیتا ہے سوچ کے بکھرے موتیوں کو

قلم سے کاغذ پہ خوبصورت حسین پیکر

انڈیل دیتا ہے جب بھی چاہے

میں ایک دن اس سے جا ملی تھی

نجانے کتنے ہی مخمصوں میں گھری ہوئی تھی

قباحتوں نے جکڑ کے مجھ کو

مہیب گھیرے میں لے لیا تھا